Barcelona ka marrë në konsideratë blerjen e Yerry Mina nga Palmeiras në muajin janar, pasi Javier Mascherano kërkoi të largohej nga klubi në muajin e ardhshëm. Barcelona ka opsionin e parë për të marrë 23-vjeçarin, i cili do të kushtojë 10 milionë euro deri në verën e ardhshme, atëherë kur Palmeiras do të jetë i lirë që të rrisë çmimin. Gjithsesi, trajneri Ernesto Valverde ka kërkuar një qendërmbrojtës për merkaton e janarit, jo vetëm për të zëvendësuar Mascherano, por edhe Samuel Umtiti, i cili nuk do të luajë deri në fund të shkurtit 2017, si pasojë e një tërheqje muskulore.
Xhaxhai i Mina, Jair Mina, i cili është njëkohësisht edhe menaxheri i tij, deklaroi: “Isha në Sao Paolo gjatë javës së kaluar dhe fola me drejtuesit e Palmeiras, pasi kisha pasur një kontakt edhe me Barcelonën. Kjo është e vërteta, duke parë të gjitha rrethanat kemi vendosur të presim dhe në janar të shohim se çfarë do të ndodhë me të ardhmen e Yerry. Aktualisht, ai është me pushime dhe është i përqendruar te Palmeiras, sepse ka një kontratë me këtë skuadër, por në momentin që Barcelona do të trokasë në dyert e klubit, ne do të jemi gati për transferimin”.
