Ajo që është e sigurt është se Barcelona-Juventus është një ndeshje që do të zgjasë shumë. Jo vetëm sepse është Champions-i në prag, por nga Katalunja vijnë mesazhe direkte dhe të pakoduara nga fronti i merkatos. Objekti për të cilin bëhet fjalë është Paulo Dibala, i cili është në shënjestrën e klubeve më të mëdha të Europës dhe pa dyshim edhe Barcelonës.
Drejtori sportiv i katalanasve, Robert Fernandez, ka marrë përsipër detyrën e vështirë për të përmirësuar më tej një skuadër, e cila, për hir të së vërtetës, ka pak vend për përmirësime. Sipas shtypit spanjoll, Fernandez ka piketuar dy emra, të cilët në të ardhmen mund të bëhen pjesë e klubit dhe njëra prej dy kandidaturave është zbuluar të jetë ajo e sulmuesit argjentinas të Juventusit.
Në intervistën e tij dhënë gazetës “Mundo Deportivo”, Fernandez ka folur për synimet e klubit që ai përfaqëson gjatë merkatos verore. Sipas tij, edhe skuadra blaugrana ka vend për përmirësime, por duhet pasur kujdes në zgjedhjen e lojtarëve që do të afrohen, pasi duhen marrë gjithmonë lojtarë që kanë cilësi të ndryshme nga ato të yjeve që tashmë janë pjesë e Barcelonës.
Pa e tepruar në përgjigjet e tij, Fernandez me qetësinë që e karakterizon u shpreh: “Dibala është një lojtar shumë cilësor, por ky nuk është vetëm mendimi im. A e ndjek Barcelona argjentinasin? Sigurisht që po, por vëmendja jonë është gjithmonë shumë e përqendruar në lojtarët më cilësorë, ndaj duhet të jemi gjithmonë në gatishmëri nëse paraqitet mundësia për të blerë yjet e futbollit botëror, pasi në pritje për raste të volitshme të ngjashme janë edhe rivalët tanë”.
Gazetarit, që e pyet për mënyrën se si Dibala mund të gjejë vend mes Neymarit, Messit dhe Suarezit, Fernandez iu përgjigj me diplomaci: “Dibala është një lojtar me shumë cilësi, kaq mund t’ju them për momentin”. Ndoshta kjo ishte një mënyrë për të pranuar që njëri prej treshes aktuale të sulmit do të largohet, por mes largimit të Messit apo transferimit të Neymarit drejt Mançester Junajtid apo PSG-së, skenarët e merkatos së ardhshme duken vërtet shumë të larmishme.
