Kryetari i Partisë Demokratike, Lulzim Basha pubikoi një raport të Europol, sipas të cilit, Shqipëria mbetet një burim kryesor i trafikimit të kanabisit në Bashkimin Evropian, dhe kërcënim për ekonominë dhe shoqërinë e Evropës.
Lideri i opozitës shprehet se, Rama ka dështuar në luftën kundër drogës.
Në rubrikën e përditshme në Instragram ku Basha rendit “100 dështimet e Ramës”, sot, kur kanë mbetur vetëm 11 ditë deri në zgjedhjet e 25 prillit, Basha ngre pyetjen: “Edi Rama e ka cilësuar histori suksesi betejën kundër drogës. A ka qënë realisht e tillë?
Përgjigja: Jo. Në raportin e fundit të Europol, Shqipëria cilësohet një burim kryesor i trafikimit të kanabisit në Bashkimin Europian”, nënvizon kreu i opozitës.
Sipas Europolit, 40 për qind e rrjeteve kriminale aktive në BE merren me tregtimin e lëndëve narkotike.
Produkti ilegal më i përhapur mbetet kanabisi, që në rastin e Shqipërisë transportohet kryesisht me rrugë detare drejt Italisë.
60 për qind e krimit të organizuar e kryen aktivitetin duke përdorur dhunën dhe po aq, korrupsionin, ryshfetin e thjeshtë deri te skemat e sofistikuara miliona-dollarëshe.
Catherine De Bolle, drejtueses së Europolit, tha se raporti i vitit 2021 tregon se të dy këta indikatorë po vijnë duke u përkeqësuar.
