“Ligji për Prokurorinë është bërë në mënyrë konspirative dhe pa opozitën. Ai është antikushtetues dhe synon kapjen politike të Prokurorisë”. Kryetari i PD, Basha lexoi të gjitha pikat e Kushtetutës sipas të cilave në asnjë rresht të saj nuk lejohet zgjedhje e një Kryeprokurori në mënyrë të përkohshme. Në një bashkëbisedim me gazetarët Basha citoi Kushtetutën sipas të gjitha pikave të saj Kryeprokurori duhet të zgjidhet me 2/3 e votave ose me 3/5 dhe në asnjë pikë të saj nuk flitet për një zgjedhje me shumicë të thjeshtë, sikurse pretendon Rama i bazuar në ligjin e hartuar pa praninë e opozitës dhe që bie në kundërshtim me Kushtetutën.
