Kryetari i opozitës paralajmëroi dje se procesi i konsultimeve të nisura me të gjithë faktorët e shoqërisë do të vijojë në ditët e ardhshme, por ai do të konkludojë me një aksion politik të PD në aleancë me qytetarët. Basha tha se do t’u bëhet thirrje të gjithë faktorëve për të luajtur rolin e tyre, ku secili do të marrë përgjegjësitë që i takojnë përpara vendit.
Takimet e Bashës janë shumëdimensionale. Nga njëra anë ai prej javësh ka nisur një tur dialogu me strukturat e Partisë Demokratike në të gjitha qytetet e vendit dhe nga ana tjetër ai ka vendosur në axhendën e tij takime me grupe të ndryshme interesi dhe përfaqësues të shoqërisë civile dhe mediave.
Ndërsa sytë e qytetarëve janë të drejtuara nga opozita, Basha po zgjeron atë që ai e ka quajtur prej kohësh aleancën me qytetarët kundër të keqes. Kjo aleancë ka si bazë opozitën politike, por edhe një kontekst më të gjerë, duke përfshirë edhe opozitarizmin e shoqërisë që qëndron përtej një formacioni politik.
Basha po dëgjon dhe po komunikon për të definuar reagimin që shoqëria pret në këtë moment kur praktikat autoritariste të një Kryeministri kanë kthyer vendin në një regjim droge dhe korrupsioni. Cila është rruga që do të ndjekë opozita, Basha tashmë e ka të qartë dhe po merr nga dita në ditë gjithnjë dhe më shumë mbështetje nga i gjithë spektri shoqëror. Vendi është në një udhëkryq të rrezikshëm, ndërsa PD thirret sërish të marrë një rol historik për të rikthyer demokracinë dhe për këtë kërkohet një përballje e gjithanshme me krimin e organizuar, paratë e drogës dhe korrupsionit të një qeverie dhe pushteti të damkosur si organizatë kriminale.
Takimi me përfaqësues të medias
Në një takim që zgjati për mbi katër orë, akademikë, personalitete të medias, artit, sportit, shëndetësisë, arsimit, shoqërisë civile etj., konsultuan me kryetarin e PD, Lulzim Basha aksionin opozitar në luftën kundër krimit në pushtet, trafikut të drogës dhe cenimi i zgjedhjeve të ardhshme. Gjatë takimit, Basha mori në konsideratë sugjerimet dhe opinionet e të pranishmëve në lidhje me aksionin opozitar mbi zgjidhjen e një sërë problemesh që kërcënojnë sot vendin.
“Sot pata një takim shumë të frytshëm me përfaqësues të medias; gazetarë, analistë, opinionistë; opinionbërës nga fusha të ndryshme të shoqërisë civile, në veçanti të organizatave të shoqërisë civile; por edhe të artit, të shëndetësisë, të sportit, të kulturës, të arsimit që kanë të bëjnë me tre problemet kryesore që ishin në qendër të diskutimit tonë: krimi, droga dhe kjo në lidhje me zgjedhjet e lira dhe të ndershme.
Gjatë këtij takimi të gjatë, prej më shumë se katër orësh, më shumë dëgjova sugjerime, opinione, kërkesa rreth këtyre problematikave, të cilat nuk i përkasin vetëm Partisë Demokratike, por janë tre problematikat më të mëdha me të cilat përballet sot Shqipëria dhe shqiptarët.
Basha tha se PD do të vijojë konsultimet e gjera për të ndërtuar aleancën më të gjerë të mundshme në luftën kundër krimit, drogës dhe garantimin e zgjedhjeve të lira dhe të ndershme. Ai u bëri thirrje të gjithë qytetarëve dhe faktorëve të bëhen pjesë e aksionit opozitar.
“Nga ky takim dal edhe më i inkurajuar, edhe më i vendosur për të ndërtuar së bashku me shqiptarët, me pjesën e shëndoshë, të ndershme të shoqërisë shqiptare që është pjesa dërrmuese e shqiptarëve, një aleancë sa më të madhe, një aleancë sa më solide për të siguruar luftën kundër krimit, mposhtjen e fenomenit kanceroz të kthimit të Shqipërisë në një hambar droge dhe sigurimin e zgjedhjeve të lira dhe të ndershme. Sepse ky nuk është vetëm interesi i Partisë Demokratike, por interes i Shqipërisë dhe i shqiptarëve, si interesi kombëtar në këtë emergjencë kombëtare.
Këto procese konsultimi, reflektimi, të cilat kanë nisur prej kohësh, do të vazhdojnë dhe do të konkludojnë, sa më takon mua dhe Partisë Demokratike, me formulimin e një aksioni politik opozitar për të cilin do t’u bëjmë thirrje të gjithë faktorëve të luajnë rolin e tyre, secili sipas përgjegjësive të tyre, me opozitën dhe Partinë Demokratike në përgjegjësinë e saj”, u shpreh Basha.
A.Shahini
