Kreu i PD, Basha i’u kundërpërgjigj dje përpjekjeve të Ramës për të bllokuar të drejtën e qytetarëve për referendum ndërsa deklaroi se do të jenë qytetarët ata që do të vendosin për ligjin e mbetjeve përmes të drejtës së tyre me referendum. “Pasi u hoqi të drejtën për të vendosur me referendum, Edi Rama u hoqi sot qytetarëve edhe zërin e protestës duke bllokuar mediat me një fjalim ordiner mbi qeverisjen e tij të korruptuar e të zhytur ne krim. Edhe pse i quan mediat e kazanit, ju ushtron presion dhe kontroll të rreptë. Këto janë vetëm shenjat e një fundi të turpshëm të një oligarkie plehrash. Nuk i ndalon dot qytetarët, duke u hequr zërin nga ekrani. Ata do të jenë edhe më të shumtë edhe më të palëkundur. Ata do të vendosin për importin e mbetjeve. Ata, qytetarët, populli, asnjë parti, asnjë qeveri” tha Basha në një reagim në FB.
Basha ka vijuar dje turin e dëgjimit dhe bashkëbisedimit me demokratët në Lezhë. Basha u ndal në fjalën e tij në protestën që po zhvillohet në Tiranë, ku mijëra qytetarë protestonin kundër vendimit të Edi Ramës për importin e plehrave, një çështje për të cilën 3 vjet më parë kishte dalë garant se nuk do të ndodhte kurrë. Tre vjet më pas Edi Rama e harroi këtë premtim, si gjithë premtimet e tjera me të cilat erdhi në pushtet. Sot qytetarët ndihen të tradhtuar, të varfëruar dhe të nëpërkëmbur nga Edi Rama. Por siç e ka zakon i ikën përballjes me qytetarët për mashtrimet e tij. Këtë gjë bëri dhe dje, ndërsa qindra qytetarë protestonin poshtë zyrës së tij.
“Sa herë që ka revoltë qytetare Edi Rama ia mbath si frikacak. Është ngujuar me njerëzit që i ka përdorur për të lidhur paktin me mafien, ndërkohë që qytetarët janë në shesh përballë tij e do të jenë përballë tij edhe më shumë. Nuk ka debat ideologjik, ka një debat parimor: Do të jemi me qytetarin apo do të jemi me oligarkinë? Do të jemi me shqiptarët apo do të jemi me mafien ndërkombëtare të plehrave? Edi Rama e ka bërë zgjedhjen e tij, ai ka zgjedhur mafian ndërkombëtare të plehrave dhe për këtë ka tradhtuar edhe ata qytetarë që i përdori për të ardhur në pushtet para tre vitesh. Edhe ne kemi bërë zgjedhjen tonë, së pari, duke kërkuar ndjesë për çdo aspekt të gabuar në lidhje me këtë çështje dhe së dyti, duke u rreshtuar pa asnjë ekuivok për zërin qytetar, për interesin publik.
Interesi publik fillon duke dëgjuar zërin e qytetarit sot për këtë çështje, ku mbi 60 mijë qytetarë e kërkuan të drejtën e referendumit dhe e fituan. Dhe nesër duke iu garantuar qytetarëve që për çdo çështje të interesit publik vendimet tona në qeveri nuk do të jenë vendime të prirura duke dëgjuar vetëm një palë, duke vendosur në dhomat e pushtetit me grupet e interesit, por duke pyetur dhe duke vendosur bashkë me qytetarët. Dhe ky është fillimi i një modeli të ri politik dhe shoqëror që e presin shqiptarët. Në fakt është edhe fija e fundit e shpresës për të mbyllur hendekun midis politikës dhe popullit. Fija e fundit e shpresës për t’iu treguar shqiptarëve që kjo parti, ndryshe nga çdo parti tjetër është parti e qytetarëve, është parti e popullit” tha ai.
Basha theksoi se ndërsa po i vjen ora e përballjes me qytetarët, Edi Rama ka nisur një tur tjetër për t’u mbushur mendjen qytetarëve me investime imagjinare apo duke përuruar investime të qeverisë së mëparshme. Këtë gjë po bën me bujqësinë. Pavarësisht se nuk flet qoftë dhe për një investim konkret, Edi Rama fton fermerët të marrin kredi pasi i mashtroi për subvencionet dhe mbështetjen që do t’i jepte këtij sektori.
“Vjen vërdallë dhe ju flet për bujqësinë dhe ju thotë fermerëve merrni kredi. Pse vallë kjo është detyra e Kryeministrit t’u thotë fermerëve merrni kredi?! Kjo është detyra e bankave. Ky çfarë është sekseri i bankave?! Ku i ka subvencionet? Ku i ka investimet? Edi Rama nuk bëri asgjë në këto tri vite për bujqësinë. Nuk bëri asgjë në këto tri vite për fermat. Dhe sot u vjen vërdallë si buratin dhe ju thotë merrni kredi. Sepse paratë që duhet të përfundonin në subvencione për fermat, në investime për zhvillimin rural, përfunduan në xhepat e një grushti njerëzish që i ndajnë këto para me Edi Ramën dhe qeveritarët e korruptuar në Tiranë”.
Mandatit të tij po i vjen fundi, theksoi lideri i opozitës dhe për këtë Rama nuk ngurron të hapë thesin e rrenave, për rritje pagash e pensionesh, ulje taksash e shërbime ndaj qytetarëve, pasi në tri vite bëri të kundërtën e asaj që premtoi më 2013-ën. Edi Ramën e rren mendja, theksoi Basha se do t’i ngopë shqiptarët me lugën bosh.
