Një denoncim i fuqishëm ka ardhur nga strukturat e degës së PD Pukë, ndaj kreut të bashkisë Gjon Gjonaj, duke e akuzuar për fiktivitetin e numrit të punonjësve në strukturën dhe organikën e bashkisë, përmes së cilës organizohet një skemë e pastër korruptive duke paguar individë që nuk paraqiten asnjë ditë në punë dhe që nuk ofrojnë asnjë shërbim ndaj qytetarëve.
Në profilin e tij Facebook, një nga drejtuesit e seksioneve të PD në qytet, ka dhënë “alarmin” ndaj këtij fenomeni, duke e akuzuar publikisht kryebashkiakun Gjonaj, për përfshirje në borderotë e pagesave të disa individëve që nuk paraqiten asnjë ditë në punë.
Nisur nga ky denoncim publik, si dhe nga disa zëra të brendshëm në bashkinë e Pukës, të konfirmuar dhe nga një grup këshilltarësh, kemi prirjen të besojmë se në listëpagesat e kësaj bashkie janë një numër i konsiderueshëm individësh, me lidhje klienteliste, nepotike dhe militanteske, të cilët, paguhen me taksat e qytetarëve pukjanë pa u paraqitur asnjë ditë pranë mjediseve të tyre të punës.
Skandali shkon dhe përtej, pasi “zërat” pohojnë se këta individë që paguhen, janë fëmijët e disa drejtuesve të institucioneve lokale që praktikisht ndodhen me studime “full time” apo dhe të disa të tjerëve që janë të punësuar në sipërmarrje të tjera.
Këto denoncime të bëra publike përmes rrjeteve sociale, vijnë në një kontekst të debatit të gjerë mbi kapjen e Prokurorisë së rrethit Gjyqësor të Pukës nga kryebashkiaku Gjonaj, por nisur nga kjo premisë, dega lokale e PD-së, shumë shpejt do të publikojë nismën e saj për adresimin në SPAK të shumë çështjeve që kanë të bëjnë me aktivitetin e bashkisë dhe të kreut të saj Gjon Gjonaj. /InfoPressAlbania/
