Dy gola nga Kostas Mitroglou dhe një nga Rafa Silva i dhanë fitoren 3-1 Benfica-s përballë Desportivo de Chaves, në javën e 23-të të Primera Ligas portugeze. Qendërsulmuesi grek zhbllokoi rezultatin pas 17 minutave lojë, por shqiponjat nga Lisbona u befasuan përpara pushimit ndërmjet pjesëve, me Chaves që riktheu ekuilibrat në rezultat me golin e Bressan.
Menjëherë sapo nisi pjesa e dytë e lojës, Benfica kaloi sërish në avantazh me Rafa Silva-n, ndërsa Mitroglou dy minuta përpara fundit të kohës së rregullt vulosi shifrat në 3-1. Me suksesin e arritur, Benfica e rrit në katër ndeshje serinë e fitoreve radhazi dhe u ngjit në kuotën e 57 pikëve, duke konsoliduar kreun në Primera Liga-n portugeze.
