Duket disi e çuditshme, por Beshiktashi është dashuruar pas shqiptarëve. Pasi shfaqën interes për Mirlind Dakun që luan në Rusi me Rubin Kazanin, shigjetat e klubit turk janë hedhur diku tjetër.
Një sulmues i përshtatshëm për ta do të ishte edhe Myrto Uzuni. Beratasi u la jashtë listës nga Silvinjo dhe po shijon pushimet në Venecia me të fejuarën e tij, teksa lajmet për të nuk ndalen.
Sipas asaj që Murat Ozen (gazetar sportiv turk) thotë, Beshiktashi ka hedhur vështrimin nga Myrto i cili me shumë mundësi do të largohet nga Spanja.
Granada e ka bërë të qartë se klauzola e largimit të sulmuesit është 12.5 milionë euro pasi 28-vjeçari ndodhet ende nën kontratë me klubin që shënoi 11 gola në La Liga.
Nga ana tjetër, nëse drejtuesit binden, Beshiktashi nuk e ka problem të paguajë një shifër të tillë, pasi në janar pagoi 10 milionë euro për Ernest Muçin.
