Qeveria publikoi pak ditë më parë projeksionet e reja në lidhje me ecurinë e borxhit publik për periudhën afatmesme, 2017-2019, të cilat i ka rishikuar me rritje.
Tabela e konfiguruar në buxhetin afatmesëm e publikuar së fundmi në Fletoren Zyrtare tregon se, parashikimet e reja e çojnë me rritje borxhin publik me 0.5 deri në 2 pikë përqindje nga viti 2016 në vitin 2019.
Në janar të vitit 2016, Ministria e Financave kishte parashikuar që borxhi publik të arrinte në 70.9% të PBB në fund të vitit 2016, por zhvillimet e mëvonshme kanë bërë që treguesi i borxhit të jetë më i lartë, duke arritur në kuotën e 71.4% të PBB-së.
Për vitin 2017, sipas parashikimeve të fundit, totali i detyrimeve do të arrijë në 69.2%, ndërsa në janar të 2016 ky tregues nuk ishte më i lartë se 67.9% e PBB.
Me rritje janë rishikuar edhe treguesit e borxhit për 2018 dhe 2019. Sipas projeksioneve të fundit, borxhi do të arrijë vitin e ardhshëm në 65.7% e PBB, teksa parashikimet e janarit 2018 ishin që ai të arrinte në 63.9% e PBB-së.
Në vitin 2019, parashikimi i fundit pret një borxh sa 61.3% e PBB-së, nga 59.3% që ishin pritjet e janarit 2016.
Për të tretin vit radhazi, qeveria shqiptare rishikon me rritje ecurinë e borxhit publik në krahasim me objektivat që i vuri vetes në vitin e parë të qeverisjes së saj.
Me këtë ecuri, qeveria nuk ka mundur të respektojë as marrëveshjet me institucionet financiare ndërkombëtare, FMN dhe Bankën Botërore, të cilat prisnin që totali i detyrimeve të zbriste në 54% të PBB-së në fund të vitit 2019.
Raporti për rreziqet fiskale
Forumi Ekonomik Global ka publikuar raportin e rreziqeve globale për vitin 2017.
Për Shqipërinë, rreziku kryesor renditet ai fiskal, që është konsideruar si i tillë nga 72.3% e të anketuarve. Përqindja e bizneseve që mendojnë se rreziqet fiskale në Shqipëri janë të larta, është shumë më e lartë se në vendet e tjera të rajonit, ku në Serbi ai është risku i shtatë (me 23%), në Maqedoni po i shtati (me 19.5%), në Bosnjë sërish i shtati me rreth 26%. Ndryshe nga Shqipëria, vendet fqinje të rajonit si rrezik kryesor kanë të listuar papunësinë.
Vitin e kaluar ishte emigracioni, rreziku kryesor i cilësuar nga bizneset.
Në vend të dytë është konflikti mes shteteve, me 50% të të anketuarve që e kanë përmendur këtë si një problem.
Tregtia e paligjshme konsiderohet si problematike nga 41% e të anketuarve dhe shqetësimi i katërt është rreziku nga terrorizmi.
Në vend të pestë është dështimi i mekanizmave financiarë ose institucioneve.
Nga lista e rreziqeve globale, të anketuarve u është kërkuar që të zgjedhin pesë rreziqet globale për të cilat ata janë më të shqetësuar se do të ndikojnë në procesin e të bërit biznes gjatë 10 viteve të ardhshme. Përqindja tregon peshën e të anketuarve që e kanë zgjedhur rrezikun në mes të 5 shqetësimeve kryesore.
“Monitor”
