Brazil, portieri vrasës rikthehet në burg

Hapen sërish dyert e burgut për portierin brazilian Bruno Souza, i cili në marsin e vitit 2013 u dënua me 22 vjet heqje lirie për vrasjen e ish-të fejuarës, Eliza Samudio. Portieri i skuadrës, Boa Esporte, në të shkuarën pjesë e Corinthians e Flamengo, pas katër viteve në burg fitoi përkohësisht lirinë në pritje të një vendimi të ri nga një panel prej 5 gjykatësish, të cilët vendosën në favor të dënimit të futbollistit, i cili duhet të qëndrojë edhe 18 vjet pas hekurave për të kompletuar gjithë pjesën e mbetur të dënimit.
I dënuar nga shkalla e parë e gjyqësorit me 22 vjet heqje lirie për vrasjen e të fejuarës, Eliza Samudio, portieri brazilian gjeti përkohësisht një klub ku të aktivizohej. Ai nënshkroi një kontratë 2-vjeçare me skuadrën Boa Esporte që militon në Serie B të kampionatit Minas Gerais me shpresën e nisjes së një jete të re. Përpara arrestimit, ish-portieri i Flamengos ishte edhe në orbitën e kombëtares për të marrë pjesë në Botërorin 2014. Vendimin e parë gjykata e mori në vitin 2013 dhe më 24 shkurt ai doli nga burgu. Vrasja e ish-të fejuarës modele disa vjet më parë tronditi botën e futbollit dhe jo vetëm për shkak të makabritetit të kësaj ngjarjeje, pasi kufomën e viktimës ai ua hodhi qenve duke zhdukur çdo provë, por policia arriti ta kryqëzonte duke e çuar përpara gjykatës.

Exit mobile version