Ka një qasje ndryshe dhe paradoksale Shqipëria, krahasuar me vendet e tjera të Europës. Nëse 20 për qind e Produktit të Përgjithshëm Bruto ekonomisë sonë i vjen nga bujqësia, nga rreth 4 për qind që është mesatarja e BE-së, nuk ndodh e njëjta gjë me arsimin.
Mbi 30 për qind e fuqisë punëtore është e angazhuar në bujqësi në vendin tonë, ndërsa pavarësisht kësaj degët që lidhen me agronominë dhe veterinarinë për të mos u mbyllur afrojnë bursa studimi aq sa paga minimale, por mbeten sërish në rrezik mbylljeje.
Por çfarë ndodh në BE?
Në mesin e 1.5 milionë studentëve të masterit në BE në vitin 2022, 905,678 ishin gra, që përfaqësonin 58.6% të totalit. Në nivel doktorature, kjo përqindje ishte 48.5% nga gjithsej 99,204 doktorantë. Në nivel master, gratë përfaqësonin shumicën e studentëve në të gjitha vendet e BE-së, me përjashtim të Luksemburgut, ku kishte një ekuilibër gjinor me 49.8% të studentëve që ishin femra. Përqindja më e lartë e femrave në studimet master është regjistruar në Qipro, me 74.2%, e ndjekur nga Polonia (67.3%) dhe Lituania (66.1%).
Për studimet në nivel doktorature, përqindjet varionin nga 42.3% në Luksemburg, 43.3% në Austri dhe 44.1% në Çeki, në 57.4% në Lituani, 58.0% në Qipro dhe 59.6% në Letoni.
Gratë në studimet master dhe doktoraturë në BE, 2022 (% e grave në numrin total të studentëve në secilën kategori)
Midis 2013 dhe 2022, pesha e grave në studimet master në nivel të BE-së ra lehtë me 0.4 pikë përqindje (pp) për shkak të uljes së përqindjes së studentëve femra në 12 vende. Këto varionin nga -0.1 në Slloveni, -0.3% në Çeki, Maltë dhe Poloni, në -3.4% në Letoni dhe -3.6% në Hungari.
Në të njëjtën periudhë, pesha e grave në studimet e doktoratës u rrit me 1.0 pp, me 19 vende të BE-së që regjistrojnë rritje të numrit të studentëve femra. Rritja më e lartë u regjistrua në Qipro, me +8.0 pp nga viti 2013 në 2022.
Gratë përfaqësonin përqindjen më të lartë të studentëve në fushën e arsimit në BE si në studimet master (75.6%) dhe doktoraturë (66.9%) në vitin 2022. Ndonëse nga të dhënat e fundit të Eurostat, Instituti Europian i Statistikave, nuk është përfsbhirë Shqipëria dhe vendet kandidate në BE,
Kur bëhet fjalë për studimet master, përqindjet më të larta të grave, pas arsimit, janë regjistruar në programet dhe kualifikimet gjenerike (73,7% e grave), artet dhe shkencat humane (69,5%) dhe shkencat sociale, gazetari dhe informacion (68,7%).
BE, fushat e preferuara në doktoraturë
Fushat e preferuara ishin të ndryshme në nivel doktorature, ku e dyta më e njohura ishte shëndetësia dhe mirëqenia (60.9%), e ndjekur nga bujqësia, pylltaria, peshkimi dhe veterinaria (57.5%). Ironikisht Bujqësia, pylltaria, peshkimi dhe veterinaria mbeten ndër degët më pak të preferuara nga studentët në Shqipëri dhe si rrjedhojë edhe nga doktorantë, në studimet e thelluara. Vetëm pak ditë më parë në Universitetin Bujqësor të Kamzës SPAK arrestoi rreth 24 pedagogë për shpërdorim të fondeve publike të këtij universiteti.
Shkencat sociale, gazetaria dhe informacioni (57.3%) dhe artet dhe shkencat humane (53.3%) dolën në vendin e 4-të dhe të 5-të.
Si në nivelin e masterit ashtu edhe në atë të doktoraturës, gratë ishin të nënpërfaqësuara në fushën e teknologjive të informacionit dhe komunikimit (përkatësisht 26.2% dhe 22.6%) dhe inxhinierisë, prodhimit dhe ndërtimit (33.4% dhe 32.7% respektivisht). /Liberale.al/
