Dani Ceballos e ka vendosur: Do t’i bashkohet Realit të Madridit për sezonin e ardhshëm, megjithëse ka kërkuar disa ditë kohë për t’u konsultuar me familjen për të dhënë përgjigjen përfundimtare. Barcelona vazhdon të insistojë për talentin spanjoll të Betisit, i cili zgjedhje të parë ka Los Blancos. Kushti i 20-vjeçarit është të mos huazohet, por të bëhet menjëherë pjesë e Realit për sezonin e ardhshëm.
Drejtuesit e kampionëve në fuqi të Spanjës e kanë zgjidhjen edhe për këtë problem: Do të shesin Moratën dhe James Rodriguezin për t’i dhënë më shumë mundësi aktivizimi Ceballosit. Kjo është arsyeja kryesore pse oferta e Barcelonës është parë me skepticizëm nga lojtari i Shpresave të Spanjës. Edhe pse nuk ka dhënë përgjigje përfundimtare, pritet që pas disa ditësh 20-vjeçari të firmosë me Realin.
Ndërkohë nga Franca nuk vijnë lajme të mira për Realin e Madridit. Përfaqësuesit e Kylian Mbappe, talentit të Monacos, mësohet se kanë nisur bisedimet me PSG, që i ka ofruar plot 12 milionë euro pagë vjetore 18-vjeçarit. Në këto kushte duket se e ardhmja e Mbappe-së do të jetë po në Francë, jo te skuadra e Principatës, por te PSG.
Kylian Mbappe i ka vënë disa kushte Real Madridit. Sipas “Diario Gol”, ylli i Monacos, Kylian Mbappe ka disa kushte për Real Madridin, e cila ka shfaqur interesim që lojtarin ta transferojë në “Santiago Bernabeu”.
Mbappe u ka bërë me dije drejtuesve të Los Blancos se nuk pranon të transferohet në “Santiago Bernabeu” nëse nuk bëhet ndër lojtarët më të paguar. Ai kërkon të bëhet lojtar titullar te Los Blancos dhe dëshiron pagë të njëjtë me Gareth Balen, dhe më të vogël sesa të Cristiano Ronaldos.
Ndërkohë, Cristiano Ronaldo ka bërë të ditur se do t’i mbetet besnik Real Madridit. Sipas të përditshmes sportive madrilene “AS”, Cristiano Ronaldo ka ndërruar mendjen dhe tani dëshiron të mbetet në Real Madrid. Thuhet se ylli portugez, ka njoftuar drejtuesit e klubit se nuk dëshiron të largohet nga “Santiago Bernabeu”.
Së fundmi spekulohej se Ronaldo kishte vendosur të largohej nga Spanja dhe të gjejë një skuadër të re gjatë afatit kalimtar të verës. Pas këtij lajmi ishte përfolur se Ronaldo ka ofertë nga Manchester United dhe PSG. Por, si duket e ardhmja e Ronaldos do të jetë në Madrid edhe për një kohë të gjatë.
