Në Shqipëri ka 16 grupe kriminale me rrezikshmëri të lartë shoqërore të lidhura me trafikun e kokainës dhe me tregjet ndërkombëtare të krimit.
Raporti i publikuar sot nga SPAK-u për vitin 2024 flet për një depërtim në gjyqësor, në prokurori, në polici dhe media me struktura mbi baza familjare dhe miqësore në qarqet e Tiranës, Durrësit, Shkodrës, Kukësit, Lezhës, Elbasanit dhe Vlorës.
Ajo për të cilën nuk flet SPAK-u është depërtimi në politik edhe pse ndër rreshta pranohet presioni nga krimi i organizuar dhe politika.
Teksa deklaroi se 33 ish-zyrtarë të lartë janë në hetim, ka 328 procedime penale, se janë përgjuar mbi 3000 telefona, 65 milion euro janë asetet e bllokuara, Prokuroria e Posacme nuk jep asnjë shifër për hetimin e krimeve zgjedhore, asnjë dosje dhe lidhje konkrete të këtyre grupeve me politikën.
PD që e ka ngritur edhe më herët këtë shqetësim, i është drejtuar Prokurorisë së Posacme lidhur me ngritjen e task forcës për hetimin e krimeve zgjedhore dhe kërkon informacione sesa hetime ka nisur SPAK-u për këto krime, së paku që nga janari i këtij viti kur u nis edhe nisma.
Për të folur në lidhje me këtë temë, e ftuar në emisionin “Ora e Betit”, zëdhënësja e Koalicionit Euroatlantik, Doriana Musai.
” Jemi para faktit që kemi 12 vjet në 3 qeveri që kanë provuar sistematikisht që janë të korruptuara dhe kanë një pikë të përbashkët që kanë të njëjtin kryeministër.
Kanë provuar sistematikisht dhe njerëzit kanë përfunduar prapa hekurave duke nisur nga kryetari i bashkisë.
Një qeveri që ka dalë nga votat e krimit dhe kjo është e vërtetuar nga SPAK-u.
SPAK-u na i ka thënë të gjitha.
Kemi disa nga kandidatët, si dhe rasti Çyrbja meqë është bërë klasiku i Durrësit është e vërtetuar që ka dalë nga votat e krimit të organizuar në bashkërendim me strukturat e partisë politike, në këtë rast të Partisë Socialiste.
Ajo që ka ndodhur është që SPAK-u i ka thënë, i ka bërë vepra dhe ka ndodhur që dy forca politike kanë amnistuar ato që SPAK-u ka dënuar.
Kjo është këmbana e alarmit që u ngrit vitin e kaluar dhe këtu vjen ndoshta edhe mbështetja e gjithë njerëzve sepse u pa që 80% e popullatës e mbështesin drejtësinë.
Duhet të pranojmë që ne kemi pasur një mungesë të thelluar të drejtësisë këto 35 vite. Prandaj ka gëluar krimi gjithandej, prandaj ka gëluar korrupsioni, prandaj kemi papërgjegjshmëri të institucione dhe kemi këto pasoja që kemi dhe i kemi denoncuar në këto studio e shumë të tjera”, u shpreh Musai.
