Vangjush Dako u ‘rikthye’ në krye të Bashkisë së Durrësit pas tërmetit tragjik të 26 nëntorit, atëherë kur emri i tij lakohej më shumë për ngjarjen e rëndë. Me bekimin e Ramës, ai ia doli të katapultonte në krye të kësaj bashkie të besuarin e tij, Zhyljen Varfaj.
Por njeriu i shpallur si i padëshiruar në SHBA për shkak të ‘korrupsionit të madh’, duket se ‘de facto’ vazhdon të udhëheqë edhe Partinë Socialiste të qytetit bregdetar, pavarësisht se është larguar prej aty zyrtarisht.
Gjatë festës së Krishtlindjes, Dako ishte në krye të grupit të deputetëve socialistë, kryetarit të qarkut dhe prefektit, të cilët vizituan Kishën Ortodokse në Durrës.
Për ironi, ‘vartësi’ i tij, Zhyljen Varfaj, mungonte.
Vangjush Dako u pa në krah të kryeministrit Edi Rama, në disa raste, edhe gjatë ditëve të pas-tërmetit kur vazhdonin përpjekjet për nxjerrjen e trupave nga rrënojat e ndërtesave të shembura.
Në një rast, ai u pa duke folur me Ramën se si duheshin ‘rregulluar disa letra’.
