Demokracia nuk është në gjendje të mirë, ka deklaruar të dielën Papa Françesku, teksa u ka kërkuar politikanëve të shmangin populizmin dhe në vend të kësaj të punojnë së bashku për të ndërtuar shoqëri më të forta.
Papa 87-vjeçar ishte në qytetin verilindor të Triestes për një vizitë, udhëtimi i tij i katërt brenda Italisë në pak më shumë se dy muaj, ndërsa përgatitet për një udhëtim 12-ditor nëpër Azi në shtator, raporton Reuters.
Duke folur në një konventë vjetore katolike romake për çështjet sociale, Papa ka thënë se shumë njerëz ndihen të përjashtuar nga demokracia, ndërsa të varfrit dhe të dobëtit janë lënë të kujdesen për veten e tyre.
“Është e qartë se demokracia nuk është në gjendje të mirë shëndetësore në botën e sotme”, ka thënë Françesku.
“Le të mos mashtrohemi nga zgjidhjet e lehta. Le të jemi të pasionuar për të mirën e përbashkët”, ka shtuar ai, duke nënvizuar dëmin e shkaktuar nga “korrupsioni dhe paligjshmëria” politike.
