Vangjush Dako, kryetari i Bashkisë së Durrësit, është thirrur sërish sot në Prokurorinë e Krimeve të Rënda, ku është pyetur në lidhje me atë që quhet “Dosja 339”, me përgjimet për shitblerjen e votës në zgjedhjet e qershorit të vitit 2017, raporton Fax News.
Bëhet e ditur se Dako ishte thirrur në prokurori edhe ditën e enjte dhe është pyetur nga hetuesit për 5 orë me rradhë.
Publikimi i përgjimeve të kreut të Bashkisë së Durrësit me disa prej eksponentëve kryesorë të krimit të organizuar në Qarkun e Durrësit, shkaktoi një tërmet të vërtetë politik në Shqipëri duke i dhënë një goditje të fortë “besueshmërisë” së zgjedhjeve të vitit 2017.
Ende nuk janë dhënë detaje rreth asaj se çfarë kanë pyetur hetuesit apo se çfarë ka thënë Dako gjatë këtyre 2 ditëve në Prokurorinë e Krimeve të Rënda.
