Transferimi i Marvin Çunit nga radhët e Frozinones te Rubin Kazan në Rusi me sa duket është një çështje e mbyllur. Sulmuesi i talentuar shqiptar, pas vetëm një viti në Itali ka vendosur që të shkojë në kampionatin rus dhe kërkesën e ka bërë ai, siç e tregoi vetë drejtuesi i klubit të Serisë B.
Guido Anxheloci, drejtori sportiv i Frozinones, ka zbuluar se Çuni i kishte kërkuar klubit të transferohej dhe se çështja ishte pranë finalizimit.
“Sot ose nesër Çuni do të largohet pasi ka kërkuar shitjen dhe do të shkojë në Rusi. Unë kërkova Okereken pasi e dija që Çuni do të largohej”, shpjegoi ai para gazetarëve.
Kësisoj, pritet vetëm zyrtarizimi i marrëveshjes mes palëve me Çunin i cili do t’i bashkohet Mirlind Dakut në radhët e klubit rus për të formuar me të dyshen e sulmit atje.
