Pa ndërhyrjen e Shteteve të Bashkuara, vendet evropiane do të flisnin gjermanisht, deklaroi sot Donald Trump, duke përsëritur dëshirën e tij për të shpallur një festë kombëtare amerikane për fitoren ndaj Gjermanisë naziste.
Presidenti amerikan talli faktin që Franca e feston fitoren kundër nazistëve më 8 maj.
Presidenti amerikan shtoi: “E dini, nuk dua të dukem mendjemadh, por kur Hitleri mbajti fjalimin e tij në Kullën Eifel, do të thosha që kjo nuk ishte tamam gjëja më e mirë”, tha ai, ndërsa disa ushtarakë qeshën. Trump i referohej pushtimit të Francës nga trupat naziste në vitin 1940 pas kolapsit të ushtrisë franceze.
Duke folur për festimet e 8 majit, shtoi: “Meqë ra fjala, e quajta presidentin Macron një tip simpatik”. Më pas e imitoi udhëheqësin francez me një theks të lehtë: “Donald, ne festojmë fitoren tonë ndaj gjermanëve”. Dhe Trump qeshi: “A nuk është e mrekullueshme?”
“E fituam luftën dhe ata ndihmuan, por pa ne nuk do ta kishin fituar”, tha ai, duke iu referuar të gjitha vendeve evropiane që festojnë fitoren ndaj nazistëve më 8 maj 1945, si dhe Rusisë (trashëgimtare e Bashkimit Sovjetik), që e feston më 9 maj.
“Pa ne, do të flisnin gjermanisht, ndoshta edhe pak japonisht. E fituam luftën dhe jemi të vetmit që nuk e festojmë”, shtoi ai, përpara se të përsëriste dëshirën për të vendosur një festë publike për të nderuar këtë fitore.
Në fillim të majit, presidenti amerikan bëri komente të ngjashme, duke minimizuar sërish rolin e vendeve evropiane, veçanërisht të ish-Bashkimit Sovjetik, i cili kishte filluar të zmbrapste trupat naziste në fillim të vitit 1943.
SHBA luajtën një rol kyç në luftë, fillimisht duke ofruar ndihmë për Aleatët, përpara se të përfshiheshin drejtpërdrejt pas sulmit japonez ndaj Pearl Harbor-it më 7 dhjetor 1941. Momenti më simbolik i ndërhyrjes së tyre në Evropë ishte zbarkimi në Normandi më 6 qershor 1944.
Sipas të dhënave të Muzeut Kombëtar Amerikan të Luftës së Dytë Botërore, Shtetet e Bashkuara humbën 416.800 ushtarë gjatë luftës, pak më shumë se Mbretëria e Bashkuar (383.600), por ndjeshëm më pak se Bashkimi Sovjetik, humbjet e të cilit vlerësohen nga 8,8 deri në 10,7 milionë ushtarë.
