Presidenti i SHBA Joe Biden ka deklaruar se hoqi dorë nga gara për t’u rizgjedhur sepse kishte frikë se beteja brendapartiake për kandidaturën e tij do të ishte një “shpërqendrim i vërtetë” për demokratët dhe se prioriteti i tij më i lartë ishte të mposhtte Donald Trump në nëntor.
Në intervistën e tij të parë që nga largimi nga gara, Biden deklaroi se nuk kishte asnjë problem serioz me shëndetin e tij.
Presidenti amerikan u zotua se do të bëjë fushatë për Kamala Harris. “Ne duhet, ne duhet, ne duhet të mposhtim Trump”, tha ai për CBS News.
“Dhe unë isha i shqetësuar nëse do të qëndroja në garë. Ju do të më intervistonit, pse tha Nancy Pelosi, pse e bëri këtë – dhe mendova se do të ishte një shpërqendrim i vërtetë.”
Ish-kryetarja e Dhomës së Përfaqësuesve, Nancy Pelosi, u raportua gjerësisht se ka udhëhequr përpjekjet për të rrëzuar Biden, një pretendim që ajo nuk e ka mohuar, pas performancës së tij në debat kundër Trump më 27 qershor.
Gjatë intervistës së regjistruar paraprakisht dhe të transmetuar të dielën, Biden foli gabim disa herë, por në përgjithësi dukej më koherent se gjatë debatit të drejtpërdrejtë televiziv.
