Tërmeti i mëngjesit të sotëm në zonën e Korçës dhe të Kolonjës përpos dëmeve të shumta materiale ka sjellë edhe lëndime në njerëz. Sipas raportimeve të fundit, mësohet se dy banorë të fshatit Floq në zonën e Korçës janë dëmtuar si pasojë e rënies së mureve të banesës.
Sipas të dhënave të raportura nga Prefektuara e Korçës deri më tani numërohen 60 shtëpi të dëmtuara, nga të cilët 10 në fshatin Floq dhe 10 të tjera në fshatin Vidohovë.
Banorët në fshatin Floq i kanë bërë apel qeverisë që të shpallë menjëherë gjendjen e jashtëzakonshme.
Banorët nuk pranojnë të futen në banesa, për shka të frikës së një tërmeti të radhës
Ata i kanë bërë apel gjithashtu strukturave bashkiake që të nisin menjëherë ngritjen e çadrave dhe dërgimin e ushqimeve, pasi disa prej banesave janë jashtë funksionit.
“Isha shtrirë dhe në momentin që doja të ngrihesha, pata një aritmi të tmerrshme. Ime shoqe u trondit shumë. Menjëherë mora në telefon vajzën, që jeton në kat të gjashtë dhe ajo ishte shumë e trembut. E dyta më tmerroi fare. Nuk kthehemi në shtëpi sepse mund të përsëritet sërish. Unë dola në tërmetin e tretë”, tha një nga banorët.
“Shumë frikë. Isha në punë, na ranë xhamat dhe u larguam. Jemi të tmerruar. Që nga viti 1994-1995 nuk kemi parë një tërmet të tillë”, tha një tjetër.
“Frika është e madhe. Ishte shumë e fortë. Ku të rrish? Kush e di se nga do të fluturojmë. Isha vetëm në shtëpi”, tha një e moshuar.
