Eljan Kasa, kandidat për deputet në qarkun e Durrësit, i është drejtuar shqiptarëve me një analizë sociale që rrallëherë dëgjohet me këtë sinqeritet. “Lexojnë gjithë kohës vetëm premtime boshe, por nuk kanë guximin të kërkojnë ndryshim”, thotë ai, duke u ndalur te një nga plagët më të thella të shoqërisë shqiptare: dorëheqja nga përgjegjësia qytetare.
Për Kasan, ky është rezultati i një sistemi që të mban të nënshtruar përmes frikës: për një vend pune, për një legalizim që s’vjen kurrë, për një të afërm që mund të pushohet nga puna. Dhe ai nuk e sheh këtë si gabim të qytetarëve, por si një plan të mirëorkestruar që ka rrënjosur pasigurinë dhe heshtjen si mënyrë jetese.
“Kur sistemi që të shtyp, të mban peng, të përbuz, ai nuk ka përse merr më votën tënde”, shkruan Kasa, duke i bërë thirrje çdo qytetari që të mos jetë më pjesë e këtij rrethi vicioz. “Ndryshimi ndodh më shpejt se sa mendon,” nënvizon ai.
Në një klimë ku zhgënjimi ka mbërthyer vendin, mesazhi i tij shërben si një fener shprese: guxoni të besoni, guxoni të votoni ndryshe.
Postimi i plotë:
Zgjohu o njeri, një ditë e re po lind…
Dal në rrugë dhe shoh fytyra të lodhura, sy që shikojnë me pasiguri, njerëz që sillen sikur i përndjek hija e diçkaje të padukshme. Frika ka hyrë në mendjet e tyre. Jo një frikë natyrore, por diçka e ushqyer nga një sistem që i mban peng.
Në rrjetet sociale, të njëjtët njerëz që heshtin në rrugë, bëjnë “like” pa vrarë mendjen për pushtetin, paçka që me vete thonë “Në djall vafshi”, dhe “Mos u fryfshi”. Lexojnë gjithë kohës vetëm premtime boshe, por nuk kanë guximin të kërkojnë ndryshim. Një pjesë ngushëllohen me “qokën” duke përsëritur me vete shprehjen ngushëlluese “askush ska bërë asgjë për mua, të gjithë njëlloj janë”.
Çfarë po ndodh? Është frika për një vend pune, për një legalizim që nuk vjen kurrë, për një kushëri që mund të pushohet nga puna.
Kjo është frika e një sistemi që sundon me gjoba, presion dhe varësi.
Kjo nuk është Shqipëria që meritojmë!
Kjo është një panoramë që e gjejmë në lagjet e varfra të Brazilit, Venezuelës apo Kamboxhias. Por Shqipëria nuk është asnjë prej tyre! Dhe mbi të gjitha, shqiptarët nuk janë skllevër të askujt! Për diçka duhet të biem dakort, aty ku ka frikë nuk ka opozitë. Dhe një popull pa opozitë është si anije me vela që i është këputur direku në mes të detit.
Po si e duroni këtë realitet kaq gjatë? A nuk është më e lehtë të ktheni dinjitetin tuaj, të jetoni pa frikë, ashtu si të afërmit tuaj në Perëndim? Zgjidhja është më e thjeshtë se sa duket: Mos votoni politikën e vjetër!
Kur sistemi që të shtyp të mban peng, të përbuz ai nuk ka përse merr më votën tënde, ai duhet të shembet. Ndryshimi ndodh më shpejt se sa mendon. Në vend që të ulni kokën dhe ti bindeni, ngrijeni atë me guxim. dhe hakmerru; Mos i voto, largoje me votë këtë politikë kanceroze e të kalbur 35 vjeçare. Se është e vërtetë shprehja; çdo popull meriton qeverinë që ka, por në rastin tonë Shqipëria meriton më shumë. Tani është momenti!
