Mbrojtësi i Manchester Unitedit i huazuar në Estudiantes, Marcos Rojo, ka zbuluar se ai kishte qenë shumë afër të kapej me grushte me Zlatan Ibrahimovicin gjatë një seance stërvitore, mirëpo trajneri i atëhershëm i Djajve të Kuq, Jose Mourinho, kishte intervenuar dhe i kishte qetësuar lojtarët.
Marcos Rojo dhe Zlatan Ibrahimovic luajtën së bashku për një sezon e gjysmë në Old Trafford. Suedezi u largua nga Manchester Unitedi në janar të vitit 2018, ndërsa muajin e kaluar edhe Rojo e la Old Trafford dhe kaloi si huazim në Estudiantes.
“Zlatan ka karakter të fortë, për këtë më kishte paralajmëruar edhe Ezequiel Lavezzi. E dija se ai dëshironte t’ia gjuanim gjithmonë topin. Por, gjatë një ndeshje, e pashë se ai e kërkoi topin, por unë ia pasova Paul Pogbas”, ka thënë Rojo.
“Ai filloi të më bërtasë, e ngriti dorën dhe më tha shumë gjëra anglisht dhe spanjisht. Unë i thashë: “Ç’ka ke oj hundë e madhe? Mbylle gojën”. E dija se do të më vriste po të më zinte, kështu që e vetmja gjë që mund ta bëja ishte të ballafaqohesha me të”.
“Kur ne hymë në zhveshtore, unë menjëherë i thashë atij ta mbyllë gojën dhe të mos bërtasë. Ne filluam ta ofendojmë njëri-tjetrin dhe bashkëlojtarët tanë po na shikonin. Në mes, Jose Mourinho po tentonte të na qetësonte të gjithëve”.
