Po përse nuk përballen këta tanët? Sepse siç ndodh gjithmonë, lejet apo licensat nuk jepen direkt, por me sekserë e me “tarifa të kripura”.
Pas zbulimit të skandalit me mbetjet e rrezikshme të kthyer nga Tajlanda, qeveria bën të pafajshmin dhe ja ka lënë ‘dobiçin’ Kurumit.
Madje njerëz e media pranë qeverisë, po tentojnë te nxjerrin dorëjashtë edhe ministrinë e Mirela Kumbaros, kur në të vërtetë ajo ka vulosur e firmosur gjithçka.
Në shkresën e prillit 2022, ekzaktësisht në datën 20, kompanisë ‘Sokolaj’ i është dhënë leja e transportit të mjeteve të rrezikshme dhe të parrezikshme.
Kjo shkresë që është dokument zyrtar i nivelit të klasifikuar, është firmosur nga ministrja e Turizmit dhe Mjedisit, Mirela Kumbaro.
Një firmë, e cila nuk është njësoj me lejet apo licensat e zakonshme të veprimit të kompanive private. Pasi kemi të bëjmë me një operacion apo aktivitet që shkakton probleme, madje drama për popullsinë.
Në vende normale evropiane, këtë aktivitet, pra transportin dhe trajtimin e mbetjeve e bëjnë ente shtetërore që kanë një rregullore të rreptë, e me supervizim disa fish. Megjithatë, ka vende, ku këtë aktivitet e kryejnë kompani apo korporata private. Bëhet fjalë për vende të mëdha e fuqishme si SHBA, apo Britania e Madhe, që kanë edhe një përvojë në kontrollin e supervizimin e industrive të tilla. Që do të thotë se privati është më i sigurt se shteti, pasi janë kthyer këto kompani gati si ndërmarrje.
Për shembull kompani të mëdha në SHBA si FORD apo General Motors, kujdesen më shumë se shteti për punonjësit e tyre; higjienën, strehimin, fëmijët etj etj. Madje shqiptarë që kanë punuar te FORD në fillimet e shekullit të shkuar tregojnë se inspektorët e kompanisë nuk i lejonin t’i mbanin mbathjet e palara më shumë se një 24 orë.
Por që kompani të tilla janë më mirë se edhe vetë shteti, duhet që leja për aktivitete të tilla t’u jepen specialistëve që e njohin e jo mashtruesve të radhës.
E në rastin aktual, Mirela Kumbaro, menjëherë sapo Tajlanda të kishte shpallur se mbetjet e zbuluara janë të rrezikshme, duhet të kishte thirrur kompaninë e licensuar, të informohej si është puna, e së paku ti kishte hequr licensen e vetë të kishte kërkuar ndjesë që ia ka thënë lejen.
Mirë do të ishte edhe të dorëhiqej, pasi nuk është fundi i botës, që ti thotë ministrit të radhës që lejet duhet tua japë njerëzve të përgjegjshëm e jo atyre që merrem me allishverishe. Është kaq e thjeshtë të dalësh nga një problem, duke u përballur me të. Po përse nuk përballen këta tanët?
Sepse siç ndodh gjithmonë, lejet apo licensat nuk jepen direkt, por me sekserë e me “tarifa të kripura”. E pas pagesës, askush nuk e çan më kokën.
Sot njeriu i parë që duhet të jepte llogari nuk është as ‘Kurumi’ dhe as ‘Sokolaj’, por Mirela Kumbaro. E për këtë, duhet të nisë menjëherë hetimi jo nga Prokuroria e Durrësit por nga SPAK./Pamfleti
