Kandidati i Koalicionit Euroatlantik në qarkun e Vlorës, Gjergji Nika, nëpërmjet një postimi, shprehet se ky grupim mbështet SPAK-un si një domosdoshmëri për të luftuar korrupsionin.
Ai shprehet se Koalicioni Euroatlantik ka një plan konkret dhe do t’i japë fund pritjes së pafundme të qytetarëve në dyert e gjykatave.
Në një postim të shpërndarë në rrjetet sociale, Nika shkruan:
“Qytetarët shqiptarë rraskapiten me vite nëpër dyert e gjykatave. Mbi 110 000 (Njëqind e dhjetë mijë) dosje gjyqësore janë në pritje të shqyrtimit.
Nesër, në qeverisje, ne do ta ulim në mënyrë drastike këtë numër.”
Ai thotë se Koalicioni Euroatlantik do të ndërmarrë hapa të menjëhershëm për të çliruar sistemin nga barra e tepërt dhe për të sjellë një qasje më efikase ndaj qytetarëve. Konkretisht, Nika deklaron se:
“Do të heqë dorë, nga të gjitha ankimet apo rekurset e bëra nga institucionet shtetërore kundër pensionistëve.
Do të heqë dorë, nga çdo rekurs i bërë nga institucionet publike për gjyqet e marrëdhënieve të punës.
Do të rishikojmë dhe zgjidhim administrativisht, çdo proces gjyqësor me palë shtetin.
Kërkesat për Lëshimin e Urdhërit të Ekzekutimit do të bëhen tek Noteri, duke çliruar njerëzit dhe bizneset nga pritjet e pafundme.”
Në deklaratën e tij, ai kritikon ashpër qeverisjen aktuale, duke e akuzuar se ka penguar funksionimin normal të institucioneve të reja të drejtësisë përmes mosfinancimit të infrastrukturës së gjykatave dhe prokurorive:
“Rama me qeverisjen e tij, janë bërë pengesë për funksionimin normal të organeve të reja të drejtësisë. Ai vazhdon dhe refuzon, çdo kërkesë të tyre për investime në infrastrukturën e gjykatave dhe prokurorive.”
Gjergji Nika e cilëson SPAK-un si një domosdoshmëri të sistemit shqiptar të drejtësisë për shkak të korrupsionit të thellë qeveritar. Ai garanton mbështetje të pakushtëzuar për këtë strukturë, duke shtuar:
“Ne, mbështesim SPAK-un dhe qëndrojmë përkrah sistemit të drejtësisë, përballë çdo sulmi që vjen nga politika dhe subjektet që janë pjesë e hetimeve të tij.
Në një vend normal, SPAK-u nuk do të ishte i nevojshëm të ekzistonte, por ai u krijua në Shqipëri pikërisht për shkak të korrupsionit të madh qeveritar.”
Për të përmirësuar më tej situatën, Koalicioni Euroatlantik angazhohet për ndërtimin e një infrastrukture moderne për sistemin e drejtësisë, shtimin e burimeve njerëzore dhe një rishikim të menjëhershëm të hartës gjyqësore:
“Ne, do të plotësojmë çdo kërkesë të institucioneve të drejtësisë, duke financuar dhe ndërtuar një infrastrukturë të re moderne për t’i dhënë mundësi shtimit të burimeve njerëzore.
Në bashkërendim me Këshillin e Lartë Gjyqësor (KLGJ) dhe aktorët e tjerë të drejtësisë, ne do të rishikojmë menjëherë hartën gjyqësore, për t’i garantuar qytetarëve shqiptarë aksesin efetiv në drejtësi.”
