Gjykata e Shkallës së Parë në Tiranë dënoi dje me 200 mijë lekë gjobë Indrit Hoxhën, për protestat kundër bunkerit që Edi Rama ndërtoi në Ministrinë e Brendshme. Në atë protestë policët i janë vërsulur Hoxhës dhe e kanë marrë me dhunë. Por më pas njëri prej tyre ka bërë kallëzim sikur ishte Indrit Hoxha që u është hedhur atyre përsipër, i ka dhunuar dhe dëmtuar fizikisht. Videoja e dhunës policore u paraqit në seancën gjyqësore, por gjykatësi Artan Gjermeni nuk e pranoi si provë.
Theksojmë se Indrit Hoxha ka qenë shënjestër e “çunave të Saje qorrit” në mënyrë sistematike për shkak jo vetëm të aktivitetit të tij të dendur politik dhe qytetar, por edhe të të atit, Fatmir Hoxha, kryetar i Shoqatës së ish-të Përndjekurve Politikë, organizator dhe drejtues i grevës së urisë në vitin 2014 kundër Ramës. Hera e fundit që Indrit Hoxha ka “vizituar” birucat e rilindjes ka qenë bashkë me 12 protestues të tjerë të PD kundër ndërtimit të lodrave të Lal’Erit tek Liqeni.
Indrit Hoxha bashkë me disa të rinj të tjerë u shoqëruan në komisariat dhe u mbajtën për më shumë se 48 orë pa asnjë provë. Në ambientet e komisariatit është ushtruar terror psikologjik ndaj tyre. Oficerët e policisë i kanë bërë presion Indritit dhe të rinjve të tjerë demokratë që të heqin dorë nga protestat se përndryshe do të kalben në burg. Vendimi i djeshëm do të apelohet, me besimin që në shkallën tjetër të gjykimit të mos jetë ndonjë tjetër “Gjermen”, si ky i Shkallës së Parë.
Indrit Hoxha është dënuar nga një gjyqtar që para pak kohësh është përfshirë në një konflikt ku mbeti i plagosur me katër plagë. Gjyqtari Artan Gjermeni u plagos me thikë më 16 janar të këtij viti në Tiranë pas një konflikti me disa persona. Gjermeni iu gjetën në makinë 20 mijë euro dhe u hodhën dyshime se konflikti kishte ndodhur për këtë shumë parash. Policia e mbylli këtë ngjarje duke manipuluar provat.
