Në 22 gusht Bashkia e Kukësit i ka paguar plot 72 milionë lekë detyrime të prapambetura kompanisë Kevin Construction shpk. Kjo kompani, e themeluar në vitin 2007, ka si administrator shtetasin Lavdërim Gjici, por që sipas të dhënave online është në pronësi të kryetarit aktual të bashkisë, Safet Gjici.
Të dhënat janë bërë publike nga Thesari i Shtetit që në datën 22 gusht ka nisur urdhër xhirimin për paratë që duhet të shkojnë te subjekti privat, të cilat janë bërë aktive në datën 23 gusht, pra vetëm ditën e premte.
Sipas sqarimeve të dhëna nga thesari i shtetit, kanë qenë detyrime të prapambetura të Bashkisë së Kukësit ndaj shoqërisë private Kevin Construction shpk, të rrjedhura këto nga një vendim gjykate me numër 9666, datë 23.10.2017, dhe pse ka pasur një marrëveshje mes palëve për likuidimin e faturave të prapambetura në nëntor 2018.
Por siç mund të imagjonohet, për shkak të pozicionimit të Safet Gjicit kundër ish-kryebashkiakut dhe kandidimit të tij në krye të bashkisë Kukës, likuidimi i faturave nuk është bërë.
Ndaj dhe Gjici, me marrjen e detyrës, nuk ka vonuar të fusë në buxhetin e kompanisë së vet detyrimet e prapambetura që i ka pasur ndaj tij bashkia që po drejton aktualisht. Përfitues është, sipas dokumentit Medar Kajolli, për llogari të Kevin Construction, një kompani e themeluar që në vitin 2007 dhe që aktivitetin e ka të shtrirë në fushën e ndërtimeve.
