Gjykata e Krimeve të Rënda ka dhënë dje vendimin në lidhje me grupin e gjobvënësve ndaj biznesmenit të kafes, Julian Bregu, duke i dënuar me 51 vite burg në total. Kështu, Pajtim Serjani, miku i Emiljano Shullazit u shpall fajtor dhe u dënua me 7 vjet burg, së bashku me Elvis Karolin, Arianit Lulin, Klevis Kardashin si dhe Ditmar Reçin. Po ashtu, Genc Ferhati dhe Arben Hashihyseni u dënuan me nga 8 vjet burg për akuzat e gjobvënies dhe marrje të pasurisë përmes shtrëngimit.
Biznesmeni i kafes kallëzoi mikun e Shullazit, Pajtim Serianin se e kishte kërcënuar me jetë, nëse nuk i dorëzonte 13 mijë euro. Policia nuk e bëri të ditur emrin e biznesmenit pas kërkesës së tij për të mbetur anonim. Denoncimi i tij është provuar gjatë hetimeve që ka kryer Prokuroria e Krimeve të Rënda dhe Policia e kryeqytetit. Ashtu siç është provuar edhe një lloj “kontrate” që të arrestuarit e detyronin biznesmenin të nënshkruante me ta, edhe pse pa laps e letër, që e detyronte atë të paguante tek autorët 10 për qind të xhiros vjetore, në këmbim të jetës së tij e të familjarëve. Pajtim Serjani njihet në kryeqytet si një nga njerëzit më të afërt të Emiljano Shullazit, ndërsa rreth 4 muaj më parë, ai u plagos gjatë një atentati ndaj tij, ku u vra personi që e qëlloi, Artur Baze.
Policia e Tiranës më 10 shtator arrestoi në një lokal në Sauk biznesmenin e njohur të kafesë Julian Bregun dhe mikun e tij, Fatjon Brahja, pasi gjeti në makinën e tyre 1 kg kanabis, ndonëse ka dyshime se lënda narkotike mund të jetë pjesë e një kurthi të ngritur ndaj biznesmenit, pasi ky i fundit denoncoi pak kohë më parë për gjobëvënie, Pajtim Serjanin, mikun e Emiliano Shullazit. Dyshimet e forta të policisë për kurth lidhen me faktin se Julian Bregu më herët ka kallëzuar Serianin.
Biznesmeni i kafes që ishte gjobitur nga tre të dënuarit, u arrestua para pak ditësh për posedim droge. Policia dyshon se biznesmenit i kanë ngritur kurth, megjithatë kjo pistë pritet të konfirmohet nga hetimet që janë në vazhdim.
