Gjykata e Shkallës së Parë të Dubrovnikut në Kroaci ka vendosur të ekstradojë në Serbi, Ismail Morinën, të njohur si “Ballist” Morina, i akuzuar për ngritjen e dronit me flamurin “Autochtonus” në stadiumin e Beogradit gjatë ndeshjes së futbollit Serbi-Shqipëri në nëntor të vitit 2015. “Ballist” Morina vazhdon të jetë pas hekurave në Kroaci, aty ku qëndron i ndaluar prej afro një muaji. Nga informacionet e fundit ekskluzive që dispononon Opinion.al të siguruara nga gazetari Dritan Laçi, Morina ka dalë tri ditë më parë në Gjykatën e Shkallës së Parë të Dubrovnikut, ku togat e zeza kanë vendosur ekstradimin e tij në Serbi, pasi sikundër dihet prej afro dy vitesh në emër të këtij shtetasi ka një urdhër ekstradimi nga shteti serb lidhur mbi ngjarjen e ndeshjes Serbi-Shqipëri, ku ngritja e një droni me një baner të mbishkruajtur Autochtonus solli trazira në stadium dhe më pas ndërprerjen e ndeshjes.
Ffamiljarët: Do të vetëflijohemi po u ekstradua
Familjarë të Ballist Morinës janë shprehur se po bëjnë të pamundurën që i afërmi i tyre të mos ekstradohet dhe për këtë qëllim vendimin e Shkallës së Parë të Gjykatës së Dubrovnikut do ta apelojnë më tej. Pranë Ballist Morinës në këto momente ndodhet bashkëshortja e tij italiane, me profesion avokate, e cila edhe pse shtatzënë nuk e ka braktisur të shoqin në këto momente të vështira për të.
Xhevahir Morina, i vëllai i Ballist Morina është shprehur se nëna e tyre ka qenë këto ditë në Tiranë, ku ka pasur takime me zyrtarë të lartë, duke specifikuar përfaqësues pranë Ilir Metës dhe ministrin e Brendshëm teknik, Dritan Demiraj, por ende nuk kanë marrë një sinjal të qartë ndihme për të afërmin e tyre që rrezikon që nga Heroi i Beogradit tani të jetë i burgosuri i Beogradit, nëse shteti kroat vendos ekstradimin e tij në Serbi.
Po kështu, Xhevahiri është shprehur se nëse Ballist Morina ekstradohet ai do të ndërrmarrë aktin ekstrem të vetëflijimit. Koha për të dërguar në Apelim vendimin e Gjykatës së Shkallës së Parë është e pakët për Ismail Morinën. Ai duhet ta bëjë Apelimin brenda tri ditësh nga dita e djeshme.
Ministri Demiraj kontakton autoritetet kroate
Ministri i Brendshëm, Dritan Demiraj është interesuar te autoritetet kroate prej një muaji për ekstradimin e Ballist Morinës, shqiptarit që dyshohet se ngriti dronin në Beograd kur luhej ndeshja Serbi-Shqipëri. Burime nga Ministria e Brendshme bëjnë të ditur se, ministri Demiraj ka kërkuar nga autoritetet kroate që të gjykohet çështja drejt. Ai ka patur për një muaj kontakte me palën kroate. Gjykata në Kroaci ka vendosur për ekstradimin e tij në Serbi, ndërsa Morina ka apeluar vendimin.
