Avokatët e Cristiano Ronaldos e kanë fituar një padi në gjykatë kundër gruas që e akuzon futbollistin se e kishte dhunuar në Las Vegas në vitin 2009. Gjykata ka vendosur që të gjitha dokumentet e Mayorgas duhet të mbeten të mbyllura për publikun.
Kathryn Mayorga, ish-modele dhe mësuese, është duke e vënë në dyshim vlefshmërinë e një marrëveshje konfidenciale mes saj dhe Cristiano Ronaldos në vitin 2010, sipas të cilës futbollisti ia dha 375 mijë dollarë për mos i bërë publike akuzat për përdhunim.
Gjykatësi i SHBA-së, Daniel Albregts u tha avokatëve të Mayorgas se ajo do të ketë nevojë për gjyqtarë të një niveli më të lartë për të vendosur nëse akuza e saj do të vazhdojë më tutje në gjykatë apo do të zgjidhet prapa dyerve të mbyllura.
Avokatët e Ronaldos preferuan që e gjithë çështje të zgjidhet në mënyrë private dhe gjyaktësi vendosi që të gjitha dokumentet dhe dëshmitë e tjera që Mayorga mund t’i ketë të mos bëhen publike, pasi që përfaqësuesit e futbollistit argumentuan se reputacioni i tij po dëmtohet nga i gjithi ky proces.
Para rreth një viti, Kathryn Mayorga e akuzoi Cristiano Ronaldon se e kishte përdhunuar në orët e hershme të 13 qershorit të vitit 2009, në Las Vegas, pasi ishin takuar në një klub nate.
Mayorga, atëherë 25-vjeçare, e kishte raportuar sulmin në policinë e Las Vegasit. Ajo nuk e kishte identifikuar Ronaldon me emër sepse kishte thënë se ai ishte figurë publike dhe i frikësohej portugezit. Ajo ishte dërguar në spital dhe ishte hetuar nëse ka shenja përdhunimi.
Gjatë muajve në vazhdim, sipas avokatëve të Mayorgas, hetues privat të Ronaldos e kishte gjetur amerikanen dhe i kishin mbajtur shënim të gjitha lëvizjet e saj. Ajo gjithashtu pretendon se avokatët e Ronaldos e kishin detyruar atë të nënshkruante një dokument.
Në atë dokument, Mayorga premtoi se nuk do të fliste kurrë publikisht për incidentin dhe në shkëmbim i mori 375 mijë dollarë. Këtë dokument u nënshkrua edhe nga Mayorga edhe nga Ronaldo në janar të vitit 2010.
Në vitin 2017, gazeta gjermane Der Spiegel e publikoi një artikull ku Ronaldo akuzohej për përdhunim, mirëpo emri i Mayorgas ishte lënë anonim. Shumë prej informatave të gazetës ishin siguruar nga dokumente dhe mesazhe që ishin siguruar nga Football Leaks.
Agjenti i Ronaldos i mohoi menjëherë këto lajme, mirëpo asnjëherë nuk e paditi as Der Spiegelin e as Mayorgan për shpifje.
Në shtator të vitit 2018, Der Spiegel e publikoi edhe një tjetër artikull, këtë herë duke e treguar rrëfimin e plotë të Mayogas, e cila e zbuloi edhe identitetin e vet. Në atë artikull, Maryoga shpjegon në detaje se si Ronaldo e kishte sulmuar dhe çfarë kishte ndodhur me të në vitet në vijim.
Der Spiegel i zbuloi edhe disa dokumente të këtij rasti, të cilat përfshinin deklarata të dhëna nga Ronaldo. Në këto dokumente, portugezi e kishte pranuar se kishte qenë i ashpër me Mayorgan dhe se ajo i kishte thënë jo disa herë, para se ta dhunonte.
Avokatët e Ronaldos, por edhe vetë portugezi, e kanë mohuar këtë lajm disa herë. Megjithatë, për shkak të dokumenteve të besueshme të publikuara, policia e Las Vegasit i kishte rihapur hetimet për këtë rast.
Mayorga e kishte paditur yllin e Juventusit jo vetëm për përdhunim, por edhe për presionin që ia kishte bërë më vonë dhe përcjelljen përmes hetuesve privat.
