Interi është i interesuar për Julian Draxler, pavarësisht se agjenti i lojtarit insiston se do të qëndrojë te Paris Saint-Germain. Pas transferimit të Neymar për 222 milionë euro dhe spekulimeve se janë afër arritjes së marrëveshjes për 180 milionë euro me Monacon për Kylian Mbappe, PSG-ja duhet patjetër të shesë lojtarë.
Anësori gjerman, Julian Draxler, është ai që do të sakrifikohet i pari, ndërsa flitet se do të largohen edhe Matuidi e Aurier. Agjenti i gjermanit, Roger Wttmann, ditë më parë insistoi se Draxler do të qëndrojë në PSG, por gjermani u la jashtë skuadrës për sfidën e fundit dhe gjithçka flet për një largim të mundshëm nga “Parc des Princes”.
Tani është “Bild” që insiston se Interi ka hyrë seriozisht në garë për Draxlerin për të cilin janë të gatshëm të ofrojnë një shifër të kënaqshme për PSG-në, që duhet patjetër të shesë lojtarë për t’i respektuar rregullat e “fair play” financiar.
Inter ka shfaqur interesim për mbrojtësin e Bayer Leverkusenit, Aleksandar Dragoviç. Gazeta sportive italiane, “Tuttosport”, shkruan se Interi ka shprehur interesim për qendërmbrojtësin austriak, Aleksandar Dragoviç.
Ky i fundit është pjesë e skuadrës gjermane, Bayer Leverkusen, me të cilin ekip ka kontratë deri në vitin 2021. Dragoviç, i cili ka prejardhje nga Serbia, më herët ka luajtur te skuadrat si Austria Wien, Basel dhe Dynamo Kyiv.
Interi është në kërkim të një qendërmbrojtësi. Sipas “Corriere dello Sport” në radarin e nerazurrëve është qendërmbrojtësi i Manchester City-t, Eliaquim Mangala. Ky i fundit nuk është në planet e Pep Guardiolës për sezonin e ri dhe gjatë kësaj vere duhet të gjejë një klub të ri. Mangala, i cili ishte transferuar në City në vitin 2014 nga Porto, sezonin e kaluar ishte i huazuar te Valencia. Thuhet se Interi tashmë ka filluar bisedat me klubin anglez për francezin.
E ardhmja e Ivan Perisiçit është në Inter. Sipas “Sky Sports”, reprezentuesi i Kroacisë ka rënë dakord me Interin që ta vazhdojë kontratën. “Sky Sport” shkruan se gjatë kësaj jave mund të zyrtarizohet marrëveshje e re mes nerazzurrëve dhe Perisiçit. Perisiç, i cili aktualisht ka kontratë me Interin deri në vitin 2020, është kërkuar me ngulm nga Manchester United. Por, Interi i ka rezistuar ofertës së klubit nga Premier Liga, e cila ka shkuar deri në 50 milionë euro.
