Bajern Mynih ka zyrtarizuar dje dy afrimet e para të merkatos së verës. Pas Renato Sançesit i ardhur nga klubi i Benfikës, bavarezët kanë zyrtarizuar dhe transferimin e mbrojtësit të Dortmundit, Mats Hummels. Hummels ka nënshkruar kontratë me kampionët deri në 2021, ndërsa mediat gjermane shkruajnë që kalimi i tij ka vlerën e 35-38 milionë eurove.
Vetëm pak ditë pas fitimit të titullit të 4-t kampion radhazi në Bundesligë, klubi bavarez zyrtarizoi afrimet në skuadër për sezonin e ardhshëm të mbrojtësit Mats Hummels dhe mesfushorit Renato Sanches. Për të shmangur konkurencën nga klubet e tjera drejtuesit e Bayern-it i mbyllën këto dy marrëveshje në kohë rekord. Por nëse për Hummels-in, ishte pothuajse i sigurtë kalimi i tij te kampionët e Gjermanisë, Bayerni suprizoi me transferimin në Mynih të talentit portugez Renato Sanches, duke mposhtur kështu konkurencën e Realit të Madridit, Barcelonës dhe Manchester United, tre klubeve të tjera të mëdha që interesoheshin për ish-lojtarin e Benficës.
Siç bën të ditur vetëm klubi gjerman në faqen zyrtare, Mats Hummels do të jetë pjesë e Bayernit deri në 30 qershor të vitit 2021, të njëjtën datë skadence ka edhe kontrata e firmosur nga 18-vjeçari Sanches. Nuk bëhet e ditur shuma që Bayerni ka derdhur në arkat e Dortmundit për të marrë shërbimet e mbrojtësit 27-vjeçar, por sipas asaj që bëjnë të ditur mediat gjermane, klubi bavarez ka paguar klauzolën e largimit të lojtarit që varion nga 35 deri në 38 milionë euro. Menjëherë pas firmës me Hummels, foli për mediat shefi ekzekutiv i Bayernit, Karl Heniz Rummenigge i cili e cilësoi 27-vjeçarin si nga një mbrojtësit e qëndrës më të mirë në Botë.
Me afrimin e Hummels, trajneri i ri i Bayernit italiani Carlo Ançeloti sezonin e ardhshëm mund të formojë një dyshe të gjithën gjermane në qendër të prapavijës të përbërë nga ish-lojtari i Dortmundit dhe Jerome Boateng. Përsa i përket Renato Sanches kartoni i këtij të fundit i kushtoi Bayernit, 35 milionë euro plus bonuset me 18-vjeçarin që, pasi kaloi me sukses vizitat mjekësore hodhi edhe firmën në kontratë për 5 vitet e ardhshme.
