Makina e Presidentit të klubit të Kukësit, Safet Gjici është grabitur ditën e mërkurë nga persona të paidentifikuar, të cilët kanë marrë sende me vlerë. Sipas burimeve, ngjarja ka ndodhur dje në Rrugën e Kavajës në Tiranë rreth orës 12:00. Automjeti tip “Toyota” me targa AA 100 LA ka qenë i parkuar pranë Zgarës Korçare, kur autorët grabitën në makinën “Toyota” një çantë me 2 milionë lekë të vjetra, një celular, një kartë identiteti dhe një kartë banke të Safet Gjicit.
Denoncimi në polici për këtë ngjarje është bërë nga 33-vjeçari Rrahman Lushi. Nuk dihet nëse Safet Gjici ka qenë së bashku me 33-vjeçarin kur ka ndodhur grabitja. Rrahman Lushi që bëri denoncimin është shoferi i presidentit të Kukësit, Safet Gjici. Policia e Tiranës ka nisur hetimet për të zbuluar autorët e kësaj grabitjeje.
