Komisioneri për Zgjerimin, Johanes Hahn kërkoi dje që Reforma në Drejtësi të realizohet në përputhje të plotë me rekomandimet e Komisionit të Venecias. I pyetur nga mediat, për reformën në drejtësi Komisioneri Hahn e konsideroi problem kyç, që duhet të zgjidhet para pushimeve të verës. “Bëmë një inventar të realizimit të 5 prioriteteve dhe drejtësia është në zemër të përparësive. Është element kyç dhe na duhet një vendim përpara pushimit të verës. Të respektohen mendimet e Komisionit të Venecias, të respektohet marrëveshja në parim që është arritur dhe të miratohet reforma në drejtësi. Miratimi është hapi i parë, ndërsa i dyti është zbatimi i saj. Duhet zbatimi i mirë që të mund të shohim në tetor rezultatet, që shpresojmë të jenë në drejtimin e duhur. Nëse është kështu, jam optimist” u shpreh komisioneri Hahn. Ai i kërkoi qeverisë shqiptare forcimin e masave në luftën antikorrupsion, realizimin me urgjencë të Reformës në Drejtësi dhe të kritereve të tjera kyçe të vendosura si kushte nga Bashkimi Europian. “Të vazhdohet përpara me rekomandimet që kemi dhënë që të arrihet gjithçka kemi kërkuar. Institucionet evropiane po bashkëpunojnë ngushtë me ato shqiptare sidomos në disa fusha kyçe. Ne jemi mjaft të interesuar edhe për Komisionin e Venecias, të vazhdojë puna, të ecë përpara. E rëndësishme të luftohet korrupsioni, të arrihet transparenca. Duhet një sistem gjyqësor transparent. E rëndësishme edhe ekonomia. Të përmirësohen investimet. Zbatimi i këtyre reformave është mjaft i rëndësishëm. Theksohet zbatimi i 5 prioriteteve që janë shumë të lidhura me njëra-tjetrën. Shoh një vendosmëri nga ana e Shqipërisë për të ecur para. Çelja e negociatave, pjesë e procesit, por e rëndësishme se çfarë do të bëhet pas hapjes së negociatave”, deklaroi Hahn
