Kryeministri në detyrë, Ramush Haradinaj, në njëvjetorin e vënies së taksës 100 për qind për produktet e Serbisë dhe Bosnje e Hercegovinës, ka thënë se ka fituar shumë Kosova, kanë fituar prodhuesit dhe blerësit.
Haradinaj në një postim në llogarinë e tij në Facebook ka shkruar se Qeveria e re, kushdo që e drejton atë, e ka të tejkaluar presionin taksë, sepse siç ka thënë ai, atë presion për një vit e ka bartur Qeveria në shkuarje.
“E kemi bartur ne presionin, duke i thënë jo, çdo skenari të dëmshëm për dobësim. Efekti “taksë” ka dhënë frytet e saja edhe në forcimin politik të vendit, siç ka dhënë efekt përplasja dhe kundërshtimi i vazhdueshëm i ndarjes së Kosovës”, ka shkruar ai.
Ai i ka quajtur argatë të Serbisë së madhe ata kanë bërë presion për të hequr taksën.
Postimi i plotë i Haradinajt:
Si në luftë ashtu dhe në paqe, Kosova, territori i saj dhe e drejta për zhvillim, janë kauza që nuk kanë pasur çmim dhe kanë tejkaluar çdo kalkulim personal dhe politik.
Është për të ardhur keq që sot, shpirtrat e shitur dhe argatët e Serbisë së madhe, në qarqe të ndryshme, duke folur gjuhën tonë, të shqiptarit, i japin të drejtë vetës dhe tentojnë të influencojnë opinionin, duke kalkuluar interesa të tjera, që assesi nuk janë të Kosovës dhe përveç tjerash janë në dëm të saj, duke prodhuar lajme, si formë presioni për ta hequr taksën, për ta dobësuar Kosovën dhe për ta rrezikuar integritetin e saj.
Këto “analiza” dhe “opinione”, kanë një qëllim të vetëm, rikthimin e dominimit politik dhe ekonomik të Serbisë mbi Kosovën.
Ky vërshim titujsh dhe komentesh se taksa nuk ka prodhuar efekt të rritjes së prodhimit dhe të zhvillimit ekonomik, është po aq i rrezikshëm sa edhe vizatimet e hartës së Ballkanit nga tavolinat anti-shqiptare dhe të anti-paqes në Ballkan.
Kosova, sot në njëvjetorin e vënies së taksës 100 për qind ka fituar shumë! Ka fituar prodhuesi, blerësi ynë dhe ka fituar flamuri ynë!
