Mirlind Daku po i mungon Rubin Kazanit për shkak dëmtimi. Sulmuesi që luan në Rusi, nuk ia doli as t’i bashkohet Kombëtares për ndeshjet e marsit. Trajneri i Rubin Kazan, Rashid Rakimov, ka folur disa ditë më parë për situatën e Dakut. “Dëmtimi është shumë i pakëndshëm.
Mendoj se do të ketë nevojë për ndërhyrje të vogël. Do ta diskutojmë me doktorët”, tha Rakimov, duke shqetësuar tifozët. Trajneri i Rubin Kazan u pyet po ashtu dje nëse ka një kohë për rikthimin e tij. “Ka punuar individualisht. Ta shikojmë si do të rikuperohet. Luan gjithashtu me ilaçe kundër dhimbjeve. Të gjithë kanë një dëshirë. Të shikojmë çfarë do të ndodhë”, u shpreh 60-vjeçari.
PRAPASKENA- Por situata e Mirlind Dakut dihet prej disa kohësh. Ka qenë vetë sulmuesi i cili është shprehur në një intervistë të fundit se që nga muaji nëntor ai është duke luajtur me injeksione dhe për këtë është në dijeni edhe Silvinjo. Por, pa problem, Daku mund të ishte i gatshëm edhe për dy takimet e marsit, teksa nuk u preferua nga trajneri brazilian, ndryshe nga më herët, kur sulmuesi mungonte vetëm kur ishte i dëmtuar.
Burime të “Panorama Sport” bëjnë me dije se situata e Dakut në ekipin kombëtar është ftohur disi dhe kjo mund të rrezikojë edhe grumbullimin e tij në të ardhmen. Të gjithë janë koshientë se ka lobime nga agjentët që lojtarët që ata menaxhojnë të thirren në ekipin kombëtar.
Ndodh pothuajse në çdo kombëtare, megjithatë, sipas burimeve të gazetës dhe me situatën e sulmuesve, hierarkia që ka vendosur Silvinjo për momentin, nuk e favorizon Mirlind Dakun. Gjithsesi jemi herët dhe pritet të shohim se çfarë do të ndodhë deri në fundin e muajit maj, kur braziliani të nxjerrë listën për Serbinë dhe Letoninë.
