Java e fundit e 2023-it paraqitet edhe si java vendimtare për fatin politik të Sali Berishës. 26 dhe 27 dhjetori do të jenë dy data që do të vendosin shumë për të ardhmen politike t ëish-kryeministrit dhe ish-presidentit të vendit, por bashkë me të do të vendosin edhe për fatin e forcës politike që ai ka dominuar për 32 vite, Partisë Demokratike.
Në mëngjesin e se martës vëmendja do të fokusohet te GJKKO që do të vendosë mbi kërkesën e SPAK për të dhënë ose jo masën e arrestit shtëpiak për Sali Berishën. Si parapërgatitje për këtë vendim të GJKKO, Berisha nga ana tjetër në 5 ditët e fundit ka bërë disa lëvizje. Fillimisht ka nisur një proces riorganizimi të partisë që tashmë do duhet të funksionojë në këto kushte të reja që Berisha nuk do mundet të dalë nga banesa. Po ashtu, janë shtuar kontaktet me grupimin e Bardhit për të mundësuar një koordinim të aksionit opozitar edhe përtej Kuvendit.
Por 24 orë pas vendimit që me shumë gjasa do të detyrojë Sali Berishën të qëndrojë në shtëpi, demokratët janë thirrur të protestojnë. Si rrallë herë protesta është lajmëruar për t’u zhvilluar përpara gjykatës së lartë, aty ku prej orës 9 të mëngjesit në dhomë këshillimi 3 gjyqtarë do të vendosin për fatin e vulës së Partisë Demokratike, nëse ajo do t’i mbetet Lulzim Bashës, apo do t’i kalojë Sali Berishës.
Nëse ish-kryeministri dhe ish-presidenti do e respektojë masën e mundshme të arrestit shtëpiak, kjo protestë do të hynte në histori, si protesta e parë e Partisë Demokratike pa praninë e Berishës në terren.
