Drejtuesi politik i Koalicionit Euroatlantik, Lulzim Basha, nisi takimet e sotme me disa të rinj në Njësinë 10 në Tiranë, ku ishte i shoqëruar nga kandidatët për deputetë Neli Demi, Diana Toma, Eduart Kelmendi, Irsida Shehi dhe Diana Sino.
Gjatë bisedës, Basha theksoi rëndësinë e luftës kundër korrupsionit si kusht themelor për çdo politikë tjetër zhvillimi. Ai tha se qeverisja e Edi Ramës vitin e kaluar pati mundësinë që të menaxhinte 7.2 miliardë , por që nuk shkoi asnjë lekë as për shëndetësinë, as bursa për studentët, as shtoi pagat dhe as nuk u ulën çmimet. Sipas tij, paratë shkojnë në xhepat e shokëve të tij dhe të krimit të organizuar që është i lidhur me pushtetin.
Në fjalën e tij, Basha vuri theksin edhe tek roli i SPAK-ut dhe nevoja për mbështetje të institucioneve të drejtësisë. Ai tha se Koalicioni Euroatlantik është i vetmi që mbështet fuqimisht punën e SPAK-ut dhe fundin e pandëshkueshmërisë për politikanët e korruptuar, përmes vettingut në politikë.
“Pa luftë kundër korrupsionit nuk ka para për të bërë asnjë program tjetër. Ja ku jemi sot. Vjet shpenzoi 7.2 miliardë qeveria e Edi Ramës, çfarë politike ndoqi në favor të qytetarëve? Rriti gjë pensionet, jo. Përmirësoi gjë shëndetësinë, jo. Shtoi bursa për studentët, jo. Shtoi pagat, jo. Uli çmimet, jo. Uli taksat, jo. Të gjitha paratë për shokët e vet. S’ka rëndësi nëse janë ministra të korruptuar tek 7×7-313-ta, oligarkë, trajtime preferenciale, futja e krimit të organiyuar në prokurime publike, kjo është e tmerrshme. Gjithë krimi i organizuar është përpjekur të influencojë se kush do ta marri tenderin. Tani e merr vet. Ka krijuar kompani që e merr vet. Dhe një pjesë e taksave të qytetareve shkojnë në duart e krimit të organizuar që është në aleancë me pushtetin. Prandaj, problem i tyre kryesor është SPAK-u, prandaj aseti kryesor i shqiptarëve është SPAK-u dhe ne jemi të vetmit që e mbështesim. Pa marrë fund pandëshkueshmëria, nuk ka asnjë politik tjetër buxhetore. Të vetmit që e mbështesim fundin e pandëshkueshmërisë në luftën kundër korrupsionit, me mbështetje ndaj SPAK-ut, me vettingun e politikanëve, jemi ne” – tha Basha.
