Kandidati për deputet i Koalicionit Euroatlantik, në qarkun e Durrësit, Joni Myshketa, ka reaguar ndaj deklaratave të fundit të kryeministrit për përmirësimin e furnizimit me ujë në qytetin e Durrësit. Sipas tij, realiteti në terren është krejt ndryshe nga ajo që paraqitet në komunikimet zyrtare.
“Keni përmendur lagjen nr. 1 si shembull suksesi, por edhe atje furnizimi është i kufizuar dhe aspak 24 orë siç pretendoni,” shkruan Myshketa. Ai përmend si provë të qartë prania e depozitave nëpër tarraca pallatesh dhe përdorimi i boteve me ujë gjatë sezonit veror.
Për kandidatin e KEA, problemi i ujit nuk është vetëm në mungesë furnizimi, por edhe në cilësi dhe në kosto. Ai sjell në vëmendje borxhin e lartë të ndërmarrjes rajonale UKD ndaj shtetit – rreth 160 milionë euro, sipas KLSH – si dëshmi të keqmenaxhimit kronik.
“Nuk ka më vend për fasada. Ne kemi nevojë për zgjidhje reale, sepse qytetarët po paguajnë shtrenjtë për një shërbim që mungon,” përfundon ai.
Postimi i plotë:
Fort i “nderuar” kryeministri i vendit tim.
Situata e ujit në Durrës nuk është siç mundoheni ta përshkruani Ju.
Keni përmendur lagjjen nr 1 të Durrësit zemrën e qytetit dhe nuk është aspak e vërtetë që rrjeti furnizohet 24 h, por me orar të reduktuar.
Pa përmendur zonat e tjera që Ju citoni.
Mjafton të kaloni dhe të shihni depozitat e pallateve shumë katëshe, depozitat mbi tarracat e objekteve të banimit dhe bie poshtë e gjithë retorika juaj që jemi bajatur tërë këto vite duke dëgjuar “arritjet” e qeverisë suaj dhe fajet e të tjerëve.
Jo pak herë e kam ngritur personalisht në Këshillin Bashkiak çështjen e ujit të pishëm që vetëm i tillë nuk është, por në shumë raste vjen i ndotur dhe paguhet sa frëngu pulën.
Të mos harrojmë që gjatë sezonit veror fillon e lulëzon tregtia e boteve me ujë për të mbushur depozitat e njësive akomoduese.
Pa përmendur jorentabilitetin e ndërmarrjes Rajone UKD që vetëm shtetit i detyrohet 160.000.000 euro sipas KLSH.
Pra na bëni nder po të jeni pak më i sinqertë (vështirë do jetë) dhe të pranohet realiteti i dhimbshëm ku ne njerëzit e thjshtë na duhet të përballemi çdo ditë.
Nëse mandati i 4-tërt shkon për Ju, mandatin e 5-stë do të votojnë emigrantët e natyralizuar me pasaportë shqiptare pasi shqiptarët do ta kërkojnë Europën vetë të detyruar prej Jush e jo të presin pasaportën e BE prej Jush.
