Juventusi thuajse perfekt, fitoi 3-0 përballë Barcelonës në çerekfinalet e Champions League dhe hipotekon një “biletë” mes katër skuadrave më të mira. Paulo Dybala ishte ylli i mbrëmjes për bardhezinjtë, me dy gola të shpejtë të realizuar, që fundosën katalanët. Sulmuesi argjentinas zhbllokoi shifrat vetëm pas 7 minutave lojë, me lëvizje që treguan se mund të jetë pikërisht ai pasardhësi ideal i Lionel Messit.
Buffon mbajti në lojë Juventusin, duke bërë mrekullinë përballë Iniestës dhe ndryshoi rrjedhën e lojës. Pak çaste më pas, Dybala realizoi një tjetër gol të shkëlqyer, pas asistit të Mandzukic, duke mos i lënë kohë portierit Ter Stegen për të reaguar.
Në pjesën e dytë të lojës, Juventusi realizoi edhe me Chiellini-n, pas një goditje këndi. Pas tetë ditësh në “Camp Nou”, kampionët e Italisë duhet të mbrojnë avantazhin e tri golave, ndërsa kualifikimi në gjysmëfinale duket një formalitet.
Andres Iniesta e ka pranuar se skuadra e Barcelonës bëri shumë gabime gjatë ndeshjes dhe për këtë fakt e pa veten duke humbur 3-0 ndaj Juventusit. Kapiteni i katalanasve ka folur pas sfidës duke thënë se ekipi bëri shumë gabime dhe nuk i zbatoi mirë detyrat.
“Bëmë shumë gjëra gabim, sidomos në pjesën e parë të ndeshjes. Liga e Kampionëve të ndëshkon. Pësuam dy gola qesharakë dhe nuk ishim të përgatitur për t’u futur në fushën e lojës në këtë mënyrë”, tha Iniesta.
Ai analizoi pjesën e dytë të ndeshjes dhe tha se aty Barcelona bëri diçka më mirë. “Sigurisht që pjesën e dytë pashë një skuadër tjetër dhe ishim të transformuar. Meritonim të shënonim të paktën një gol, por tani është e kotë të flasësh për këto gjëra.
Goli i tretë që morën nga goditja e këndit mund të ndodhë sepse përballë kemi një ekip shumë të fortë si Juventusi, që ishte i përgatitur në maksimumin. Megjithatë, nuk i bëmë detyrat mirë dhe u penalizuam. Tani nuk na mbetet gjë tjetër, por të besojmë dhe të përgatitemi maksimalisht për sfidën e ardhshme”, theksoi më tej kapiteni i blaugranëve.
Iniesta tregoi gjithashtu edhe shanset që ka skuadra për t’u kualifikuar për më tej. “Nëse do të futemi në fushën e lojës të përgatitur, sigurisht që kemi shanse dhe do të jemi në lojë. Nëse luajmë si pjesën e parë në Torino, atëherë është e pamundur për ta përmbysur këtë ndeshje”, përfundoi Iniesta.
