Antonio Kasano dhe Mario Baloteli krijuan për pak kohë një dyshe telashesh te Italia me prapësitë e tyre dhe të gjithë i shihnin si shokë mjaft të ngushtë. Por Kasano, në një intervistë të dhënë së fundmi në Itali, nuk ka ngurruar të kritikojë sulmuesin, të cilin e sheh si të mbivlerësuar.
“Pogba, Hames Rodriguez dhe Baloteli janë futbollistë të mbivlerësuar. E kam në zemër Marion dhe në Francë po paraqitet mirë, por si ai, si Pogba, kanë pasur një fat të madh në jetë. Menaxhohen nga një menaxher shumë i aftë, Mino Raiola, i cili u ka dhënë të dyve mundësi të jashtëzakonshme”, tha Kasano.
Pak orë më vonë, Baloteli postoi një mesazh në rrjetet sociale që të gjithë e interpretuan si përgjigje për Kasanon. “Shpërtheu gjeniu. Është e vërtetë ajo që thonë, miqtë janë të paktë dhe jo në punë”, shkruhej në këtë mesazh që në mediat italiane u interpretua si përgjigja ndaj ish-shokut të skuadrës.
