Në komunikimin e drejtpërdrejtë me qytetarët në Facebook që zhvilloi gjatë takimit me të rinjtë së bashku me kandidatetet për deputete Taulanda Jupi dhe Diana Toma, drejtuesi politik i Koalicionit Euroatlantik, Lulzim Basha, iu përgjigj edhe interesimit se cili është programi i Koalicionit Euroatlantik kundër korrupsionit.
Basha tha se mbështetja pa kushte ndaj SPAK është pika e parë e planit, duke miratuar projektligjin e çuar në parlament për fonde shtesë, për burime njerëzore apo ndryshime ligjore që ndihmojnë Prokurorinë e Posaçme.
Ai më tej tha se pjesë e planit janë edhe vettingu i politikanëve, heqja e imunitetit të parlamentarëve, ngritja e Njësisë së Rikuperimit të Pasurive të Vjedhura dhe reforma të tjera duke bërë të mundur një administratë të vogël efiçente, të ngushtojë interpretimin e ligjit, të parandalojë burokracitë e përditshme dhe të jetë e përballueshme për taksapaguesit shqiptarë.
“Tani meqë e nisëm këtë lloj komunikimi të drejtpërdrejtë, e kuptoj që korrupsioni është shqetësimi kryesor i qytetarëve, shkurtimisht më duhet t’ju them se çfarë parashikojmë në planin kundër korrupsionit. E para, mbështetje pa kushte për SPAK-un. Ashtu siç kemi depozituar në këtë Parlament, kërkesën për fonde, për burime njerëzore, për ndryshime ligjore që ndihmojnë SPAK-un, ashtu do ta bëjmë realitet. Do ta bëjmë realitet, mbështetje pa kushte dhe pavarësi totale të SPAK. Jo si këta, që tjetër gjë thonë e tjetër gjë bëjnë. Apo që iu përveshën sapo ju kapën kryebashkiakët dhe ministrat me presh në duar duke thënë, Republikë Prokurorësh e tjerë e tjerë. Nuk ka Shqipëri në Bashkimin Europian, pa i dhënë fund projektit Shqipëria 313. Ky që premtoi Shqipëria 2030, në fakt i vetmi projekt realist që ka pasur është Shqipëria 313.
Së dyti, ligji për vettingun e politikanëve, i cili do të bëjë kontrollin e hollësishëm të pasurive të çdo politikani, të familjarëve të tyre, të rrethit të tyre shoqëror dhe kontrollin e atyre që quhen kontakte të papërshtatshme apo lidhje me krimin, siç ju bë gjyqtarëve apo prokurorëve, ashtu do të bëhet edhe për 140 depuetetët, kabinetin qeveritar, kreun e shtetit dhe gjithë drejtorët e rëndësishëm të vendit.
Së treti, heqja e imunitetit parlamentar. Në mënyrë që askush mos të ketë mundësinë të largohet në drejtim të paditur siç u arratis zëvendëskryeministri, zëvendësi i Ramës, kur shkoi kërkesa për arrestim për skandalin e inceneratorëve, 7×7 e inceneratorëve.
Ngritja e Njësisë të Rikuperimit të Pasurive të Vjedhura. Është një zotim i yni i shpallur më 1 qershor dhe që do të bëhet realitet, për të mundësuar që kudo t’i kenë pasuritë këta, në Shqipëri apo jashtë Shqipërie, kudo që t’i kenë investuar, t’i gjurmojmë, t’i konfiskojmë e t’jua kthejmë padronëve të tyre të vërtetë, që janë qytetarët, është publiku shqiptar. Dhe po kështu reforma të tjera, të cilat do të mundësojnë që administrata shtetërore të ketë hapësira sa më të ngushta për të interpretuar ligjin. Ligji të interpretohet drejtpërsëdrejti dhe qytetarët të mos zvarriten qoftë kur është fjala për burokracitë e përditshme, apo për pronat apo për problemet e tjera, duke bërë të mundur pra një administratë të vogël efiçente, të përballueshme për taksapaguesit shqiptarë dhe në shërbim të qytetarëve shqiptarë” – u shpreh Basha.
