Mbetet për t’u parë se çfarë do të rezervojë blloku i trajnerit Albert Bunjaki mesditën e 2 tetorit, por ndërkohë kanë nisur të qarkullojnë edhe emra të rinj për grumbullimin e Kosovës në eliminatoret e botërorit 2018. Përfaqësuesja e futbollit që ka bërë hapa domethënës që në premierën e kualifikueseve me barazimin në Finlandë, do të ketë një test akoma më të vështirë në Shkodër ndaj Kroacisë.
Përzgjedhësi i Kosovës, Albert Bunjaki ka njoftuar se këtë të dielë do të publikojë listën e lojtarëve të ftuar për ndeshjen kundër Kroacisë. Sfidë e cila do të luhet në 6 tetor në “Loro Boriçi”. Tekniku i Kosovës nuk premtoi surpriza, por forma e mirë e disa talenteve po e bëjnë të ndryshojë mendje.
Arbër Zeneli, 21 vjeç, që militon me Herenvenin në kampionatin holandez ka impresionuar me inkursionet në krahë dhe me shumë gjasa do të ketë vend në listë. Gjithashtu do të jetë edhe portieri Adis Nurkoviç, i lindur në Bosnje Hercegovinë, por me prindër shqiptarë.
Të dy këta të fundit pritet të marrin lejen e FIFA-s për të cilët kanë aplikuar së bashku me FFK. Shqetëson, ndërkohë tek kampi kosovar, dëmtimi i anësorit Milot Rashica, për të cilin ende nuk dihet nëse do të jetë titullar ndaj Kroacisë muajin tjetër.
