Ish-kreu i bandës famëkeqe të Lushnjës, Alfred Shkurti, i njohur si Aldo Bare kërkon t’i hiqet dënimi me burg përjetë. Ish-kapobanda ka dorëzuar në Gjykatën Kushtetuese kërkesën për prishjen e vendimeve të tre shkallëve të gjyqësorit, të cilat i dhanë masën maksimale të dënimit për disa vepra të rënda kriminale. Në datën 31 janar mbi bazën e dokumentave, Gjykata Kushtetuese pritet të shqyrtojë kërkesën e Bares. Ish-kreu i bandës famëkeqe kërkon shfuqizimet e vendimeve të Gjykatës së Shkallës së Parë për Krimet e Rënda, asaj të Apelit për Krimet e Rënda dhe Gjykatës së Lartë, të cilat konfirmuan dënimet njëra pas tjetrës.
Aldo Bare u dënua me burgim të përjetshëm, pasi u akuzua nga Prokuroria e Krimeve të Rënda për krijimin e organizatës kriminale, 15 vrasje, për rrëmbim personi, shkatërrim prone si dhe trafik të drogës.
Kërkesa e të fortit të Lushnjës dhe njeriut që drejtori bandën, e cila terrorizoi Lushnjën në vitet 1997-1998 është bërë pak kohë pas lirimit nga burgu të ish-kreut të bandës së Durrësit, Lulzim Berisha.
Banda famëkeqe e Bares
Banda e Bares veproi për vite me radhë, derisa vetë i shumëkërkuari u prangos pas shtatë vitesh në Turqi dhe më pas u ekstradua drejt Shqipërisë, ku ndodhet prapa hekurave. Gjykata e Krimeve të Rënda e gjeti fajtor Aldo Baren (Alfred Shkurtin) për katër vrasje, dy tentativa vrasjeje, shkatërrim të pronës me zjarr, si dhe krijim të organizatës kriminale.
Për secilën nga këto akuza i pandehuri u dënua me 247 vite burg, por në bashkim të dënimeve, përfundimisht Aldo Bare u “kyç” matanë hekurave përjetësisht. Verdikti i trupës gjyqësore, e cilësonte fajtor Aldo Baren për katër vrasje në dëm të shtetasve, Genci Kashari, Xhevat Demiri, Nimet Zeneli e Masar Aliu.
Vendimi me burg përjetë
Në vendimin e saj, Gjykata shprehej se vrasja e Genci Kasharit nuk është kryer në kuadër të organizatës kriminale, por shërbeu si pikënisje për krijimin e saj, pasi në shenjë hakmarrjeje për vrasjen e të vëllait, Aldo Bare nisi fushatën “shfarosëse”, duke ekzekutuar kundërshtarët e tij.
Tri vrasjet e tjera, janë kryer në kuadër të bandës kriminale dhe vetëm për ekzekutimin e Xhevat Demirit, i pandehuri mori dënimin maksimal me burgim të përjetshëm, pasi nga provat ka rezultuar se ka qenë dhe vetë i pranishëm në ngjarje. Sa u përket dy ekzekutimeve të tjera, Aldo Bare është dënuar vetëm si urdhërues dhe është dënuar nga 25 vite për secilën prej tyre.
Kapoja i bandës famëkeqe u cilësua fajtor dhe për tentativat për ekzekutimin e dy kundërshtarëve të tij më të fortë, Artur Daja dhe Gramoz Selmani, të cilët i bënte përgjegjës për vrasjen e të vëllait Ramadan Shkurti.
Vrasjet e bujshme të Aldo Bares në ‘97
Aldo Bare u ekstradua nga Turqia në vitin 2009. Prokuroria e Krimeve të Rënda e akuzonte Aldo Baren për “krijimin e organizatës kriminale, 15 vrasje, për rrëmbim personi, shkatërrim prone si dhe trafik të drogës”.
Vrasja e Ramadan Shkurtit, vëllait të Aldo Bares në korrik 1997, shërbeu si pikënisje e një seriali të gjatë vrasjesh dhe shkatërrimesh. Aldo Bare së bashku me të vëllanë, Ramadanin, Enver dhe Bardhyl Rabinë, nisen në drejtim të lokalit ku ndodhej Artur Daja me miqtë e tij Genci Kashari e Gramoz Selmani, si dhe të afërmit e tjerë.
Sapo i afrohen lokalit, sipas Prokurorisë, grupi i Bares qëllon në drejtim të Artur Dajës dhe nga shkëmbimi i zjarrit mbetet i vrarë Genci Kashari. Artur Daja vetëm sa plagoset. Plumbave nuk u shpëton as Ramadan Shkurti e Bardhyl Rabija, të cilët ndodheshin në makinë. Por nuk ishte e thënë që ndonjëri prej tyre të shpëtonte.
Artur Daja mbërrin pranë tyre, duke i qëlluar për vdekje. Pas kësaj ngjarjeje të rëndë, Aldo Bare krijon bandën famëkeqe dhe ekzekuton të gjithë miqtë e Artur Dajës. Vetë këtë të fundit, kapobanda, urdhrat e të cilit ishin të padiskutueshme, nuk arriti ta vriste. Por “ushtarët” e tij e vranë dhe i prenë kokën duke ia shëtitur mes përmes Lushnjës.
R.POLISI
