Emre Belozoglu është përfshirë në çështjen e krijuar për Rei Manajn, pasi ky i fundit shkaktoi faull me pasojë dëmtimin për Barish Alper Jillmaz.
Belozoglu, ish-lojtari i Fenerbahçes dhe përfaqësueses turke dhe tashmë drejtor teknik i Ankaragucu, flet për deklaratën me dy standarde të Federatës turke, që sipas tij favorizon lojtarët e Gallatasarait.
Po ashtu 44-vjeçari shprehet kundër sulmit të bërë prej disa tifozëve ndaj Manajt ku kërkohet largimi nga Turqia.
“Pas faullit të shkaktuar kundër Barish Alper Jillmaz mendoj se është e drejtë për Federatën që të deklarojë menjëherë se është një lojtar i kombëtares.
E shoh një ekzagjërim idenë që Rei Manaj duhet të largohet nga vendi.
Kur vesh fanellën e Fenerbahçes dhe një i huaj të godet, Federata nuk bëri një deklaratë të tillë. Nuk ishte për shkakun tim, por për shkak të fanellës që mbaja veshur”, u shpreh ish-lojtari legjendar turk.
