Pas javësh bisedimesh të koalicionit mbi të ardhmen ekonomike të Gjermanisë, kancelari Scholz ka shkarkuar ministrin e financave të vendit, Lindner, nga FDP.
Gazeta gjermane ‘Bild’, raportoi shkarkimin, ndërsa zëdhënësi i Scholz Steffen Hebestreit e konfirmoi atë për AFP.
Lindner kishte kërkuar reforma gjithëpërfshirëse ekonomike, të cilat janë kundërshtuar nga dy partitë e tjera në koalicion.
Çështja është se si Gjermania mund të mbyllë një vrimë në buxhetin e vitit 2025 përpara një takimi vendimtar të komitetit të buxhetit më 14 nëntor. Përplasja në shpenzime vjen pasi ekonomia e Gjermanisë ka luftuar dhe po përballet me një vit tjetër recesioni.
Pak minuta përpara se të shpallej lajmi për shkarkimin e ministrit të Financave Lindner, media gjermane raportoi se lideri i Demokratëve të Lirë i kishte sugjeruar partnerit të tij kancelarit Scholz të zhvillonte zgjedhje në fillim të vitit të ardhshëm.
Sugjerimi u propozua si zgjidhje për krizën e qeverisë. Scholz e kishte refuzuar sugjerimin, raportoi gazeta Bild .
Scholz mbajti një konferencë shtypi duke shpjeguar vendimin e tij për të shkarkuar ministrin e tij të financave, gjë që e ka vënë koalicionin e tij në rrezik të kolapsit.
I pyetur pse e shkarkoi Lindnerin, Scholz tha: “Ai e ka thyer besimin tim shumë shpesh… Puna serioze e qeverisë nuk është e mundur në rrethana të tilla.”
“Ministri i Financave Lindner nuk tregoi gatishmëri për të zbatuar asnjë nga propozimet tona,” tha Scholz, duke shtuar se kompanitë gjermane kanë nevojë për mbështetje të menjëhershme dhe “kushdo që e refuzon këtë po vepron në mënyrë të papërgjegjshme“, tha ai në lidhje me ngërçin me Lindner.
Kancelari Scholz tha se ky veprim do të ketë nevojë për një votëbesim për qeverinë e tij më 15 janar 2025.
