Kryetarja e LSI, Monika Kryemadhi tha sot se, konferenca e donatorëve tregoi se s’ka asnjë paragjykim ndaj shqiptarëve. Kryemadhi kërkoi nga qeveria që të tregojë përgjegjshmëri, ndërsa shtoi se për shtëpitë e shqiptarëve do të shkojnë 265 mln euro.
“Banesat e tyre duhet të ndërtohen sa më shpejt, në mënyrë që shqiptarët e prekur nga tërmeti dhe të mbetur pa shtëpi, të futen brenda pranverës së 2020”, tha Kryemadhi.
Sipas saj, diferenca me mbi 880 mln euro është në formën e borxhit që do t’i paguajnë shqiptarët.
Në këtë kuadër ajo propozoi një komision monitorimi për mënyrën se si do të përdoren këto fonde.
“SHBA deklaroi se do të themelojë një akademi transparence, gjë që tregon shumë qartë atë që është shumë e rëndësishme, që paratë nuk shkojnë atje ku kanë nevojë shqiptarët”, tha Kryemadhi.
Sipas kryetares së LSI-së, kjo qeveri është e paaftë për të qeverisur vendin.
“Ne do jemi të gatshëm dhe vigjilentë për të ndjekur çdo projekt për rindërtimin e shtëpiave e shkollave e çerdheve, kisha e xhamie, që janë objekte në shërbim të qytetarëve dhe do ndjekim nëse kjo qeveri këto para që Europa ja dha shqiptarëve, do i përdorë për fluturime luksoze, zyra luksoze apo investimet e tyre të luksit të administratës.
Ndaj është shumë e rëndësishme për të pasur një institucion monitorimi të pavarur me ekspertë që do bëjnë monitorimin e të gjithë këtij projekti se ajo që është e rëndësishme është se besimi i shqiptarëve tek kjo qeverisje ka humbur.
Qeveria ka treguar se është e paaaftë për të qeverisur buxhetin për shqiptarëve, nuk ka krijuar vende pune, por ka mbyllur vende pune”, tha Kryemadhi.
