Ish-presidenti Bamir Topi ishte i ftuar në Ditarin e mbrëmjes nga Bruna Çifligu nga ku foli për situatën politike në vend. Ai u ndal te ndryshimet kushtetuese të 15 viteve më parë, duke theksuar se në atë kohë kishte parashikuar zhvillimet që tashmë kanë ndodhur dhe për këtë kishte folur dhe me Sali Berishën.
“Personi që e inicioi ndryshimin kushtetues të vitit 2008 ishte Sali Berisha. Unë kam qenë në krye të shtetit dhe i kam bërë thirrje publike. Kam dhënë argumentet e mia, madje kam qenë i bindur se situata do të vinte në këtë pikë ku është sot. I kam thënë: Ki kujdes sepse nuk do të jesh gjithmonë kryeministër. E kam thënë edhe publikisht. Kjo që po bëhet, i kam thënë në atë kohë, po synon ta kthejë Shqipërinë në formatin e një republike kryeministrore, por ai që do të vijë për aq sa unë e njoh, do ta kesh shumë të vështirë ta mposhtësh më. Që nga momenti që Rama ka ardhur në vitin 2013, unë jam dëshmitar okular, profesionist, i asaj që ka bërë Edi Rama. Ishte dhe është akoma i papërmbajtshëm”, tha ish-presidenti.
Më tej, Bamir Topi u shpreh se shprehet i habitur me kryeministrin Edi Rama, që sipas tij, është i pangopur politikisht.
“Ndjej një habi të madhe, kur njeriu ka kaq vite në pushtet, duhet të mendojë që ka edhe ditë të tjerë. Por ky, pasi i ka marrë të gjithë, duke qenë i pangopur, nuk e kam fjalën për pjesën ekonomike, por pangopësinë politike, vazhdon të marrë institucione dhe t’i rrëzojë të tjerë. Madje, edhe Avokati i Popullit që duhet t’i takojë opozitës, vijon të jetë i pazgjedhur”, u shpreh Topi.
