Me vetëm dy vota Xhevdet Amuli ia ka dalë të mund kryetarin aktual të PD-së Ramiz Çobaj në garën për kryetar të degës demokrate të Shkodrës. Biznesmeni i njohur ka triumfuar në Kuvendin e degës lokale, duke u zgjedhur për 4 vite si lider i PD-së shkodrane.
Amuli është një emër mjaft i njohur në Shkodër. Ai është ndër mbështetësit historikë të PD-së, ka qenë pjesë e strukturave për një kohë të gjatë por edhe i zgjedhur në nivelin e pushtetit lokal si përfaqësues i këtij subjekti politik. Amuli vjen nga rradhët e familjeve të ish-të persekutuarëve politike.
Në Shkodër Amuli njihet edhe si dashamirës i sportit, më konkretisht mbështetës i futbollit. Ai ka qenë zëvendëspresident i Vllaznisë por edhe donator për shumë vite. Edhe kohët e fundit madje, është shprehur i gatshëm të marrë kuqeblutë në rast privatizimi të klubit shkodran.
Në vigjilje të kësaj gare, e cila nisi të premten rreth orës 19.00 kur u zyrtarizuan emrat e Amulit dhe Çobës, për shkak të kohës së pakët në dispozicion, bisnesmeni konsiderohej i dizfavorizuar në garë. Por mesa duket, ka qenë një frymë e krijuar në mbështetje të tij, duke i dhënë fitoren surprizë, pavarësisht kohës së shkurtër për të bindur delagatët të votojnë për të.
Para Amulit tashmë është një detyrë e madhe: Unifikimi dhe sheshimi i qejfmbetjeve të mundshme pas garës për kryetar dege, por edhe pas garave për kryetarët e grupseksioneve të PD. Duket se ai do ta ketë të lehtë, nisur edhe nga raporti i baraslarguar nga të gjithë ato që mund të quhen grupime të PD në degën lokale.
