Nënkryetarja e PD, Orjola Pampuri, në një reagim për mediat, i është përgjigjur ministres së Shtetit, Elisa Spiropalit, e cila në një reagim të mëparshëm, mes të tjerash, akuzoi kreun e PD që po bëhet pengesë për votimin e amnistisë penale.
Pampuri shprehet se “pas çdo zyrtari të korruptuar që shfaqet në derë të SPAK-ut, Edi Rama dhe shpura e tij shfaqen kërcënues ndaj institucioneve të drejtësisë”.
“Pas përpjekjeve për të ngritur komision që të kontrollojë punën e SPAK-ut dhe sulmeve kundër BKH-së, hapi i radhës i Edi Ramës ishte amnistia për zyrtarët e korruptuar.” – shkruan ajo.
“Amnistia për zyrtarë të korruptuar, harroje se do të marrë vota nga PD-ja. Lëri hartimet Elisë, por sillni amnistinë për qytetarët dhe jo pushtetarët!” – përfundon Pampuri.
Më poshtë reagimi i plotë:
Pas çdo zyrtari të korruptuar që shfaqet në derë të SPAK-ut, Edi Rama dhe shpura e tij shfaqen kërcënues ndaj institucioneve të drejtësisë.
Pas përpjekjeve për të ngritur komision që të kontrollojë punën e SPAK-ut dhe sulmeve kundër BKH-së, hapi i radhës i Edi Ramës ishte amnistia për zyrtarët e korruptuar.
Këtë e artikuloi sërish sot Elisa në botën e doganave.
Për të, ashtu si dhe shefin e saj, kush nuk vjedh, fle gjumë, kush nuk bën aleancë me krimin për të blerë zgjedhjet, nuk bën politikë.
Elisa i di mirë si funksionojnë këto dy mekanizma, nga doganat deri në Shkodër.
Amnistia për zyrtarë të korruptuar, harroje se do të marrë vota nga PD-ja.
PO, amnisti për qytetarët që i çuan në burg për 3 mijë lekë drita, ndërsa vetë vidhni miliona;
PO, amnisti për ata që protestonin për shtëpitë e tyre, ndërsa ju iu merrnit pronat dhe ua jepnit oligarkëve;
PO, amnisti për ata që protestuan kundër qeverisë tuaj, më e korruptuara në histori, që kriminalizoi shtetin dhe varfëroi shqiptarët.
Lëri hartimet Elisë, por sillni amnistinë për qytetarët dhe jo pushtetarët!
